Leit hajir u nongialam ka HYC ha Sadar PS ha ryngkat ka jingsynran ki dkhot

Syllad | The Rising MeghalayaMay 28, 2024

Ki dkhot ka seng Hynniewtrep Youth Council (HYC) ha ka 28 tarik Jymmang, kila leit synran ia u President ka Seng u Bah Roykupar Synrem sha Sardar Police Station hadien ka jingshah khot hajir ha kaba iadei bad ka jingjia leit pynpra iing ha Lum Survey.

U Bah Synrem u la wan mih hakhmat u investigation officer (IO) hapoh Sadar police station halor ka case ba la rejistar ha kaba iadei bad ka jingleit pynpra beain ia ki iing ki sem hapoh Lum Survey kaba la jia ha ka 23 tarik mynta u bnai.

Ki bor pulit kila register case bad pynngat ia ki nongialam ba hakhmat  jong ka HYC ha ki kyndon bapher bapher kaba kynthup ka MMPO Act. Nalor u president ki arngut kiwei pat ki nongialam kiba kynthup ia u Vice President u Donboklang Kharlyngdoh bad u Assistant General Secretary u Isaac Basaiawmoit kin sa leit hajir ha kine ki khyndait sngi ki ban wan hakhmat u IO.

Haba kren sha ki lad pathai khubor hadien ba la mih napoh Sadar PS, une u nongialam ka HYC u la ong, “Ngim don ei ei ban ong pyrshah ia ka Tnat pulit, hynrei ma ngi ha ryngkat u paidbah ngi la iohi ia ka jinglong jingman jong ka jaka hapoh Lum Survey. Ngi la leh iala ka kamram bad mynta ka sngi nga la wan mih hapoh Sadar police station namar ngi la rai ba ngin ai ka jingiatreilang ha kaba iadei bad ka jingtohkit halor kane ka phang.”

U la ong ruh ba kane ka jingwan mih shapoh police station ka long ban ai statement halor ka case ba la rejistar da ki pulit ha kiba bun ki kyndon jong ka IPC kaba kynthup ia ka MMPO.

Nalor kata u Bah Synrem u la ong ba ka case pyrshah ia ki ka long tang ka bynta jong ka jingiaid lynti hynrei ki don ia ka jingngeit bad ka jingkyrmen kaba skhem ba ki nongshong shnong jong ka Bri u Hynniewtrep ki don ryngkat lang bad ki bad kumta kim don ia kano kano ka daw ban sngew syier. U la ong ruh ba ka seng kan dang iai bteng ban trei na ka bynta ka bha ka miat jong ki trai ri trai muluk.

“Ngi tip bha ruh ba ka pisa na ki kam khaii drok kalong kaba heh bha bad ngi sngewthuh ba ki don ki briew kiba donkti ha kum kine ki kam bymman kiba kwah ban weng ia ngi na kane ka lynti jong ka jingialeh pyrshah ia u drok. Kaba kum kane ka jingpyrshang kan ym lah ban pynsangeh ia ngi ban shim ia ki mat kiba wanrah ka jingeh bad ka jingsngewkhia ia ki trai ri trai muluk. Ngi la shim ia ka rai ban bteng ha ka jingialeh bad ban btin lynti pat ia kito kiba la kyrni ha u drok sha ka lynti kaba dei,” ong shuh shuh u nongialam ka seng.