Lehkmen 75 Independence Day Week Celebration ka MBS&G, West Jaintia Hills

Syllad | The Rising MeghalayaAugust 12, 2021

Ka Meghalaya Bharat Scouts & Guides, West Jaintia Hills District kum shibynta ban rakhe iaka lyngkhuh snem ba 75 ka jingiohlaitluid ka Ri India ne Independence Day, mynta ka kynti ka la shim ban pynlong ia ka taiew lehkmen lehburom kyrpang  ia kaba la tip kum ka 75th Independence Day Week Celebration 2021.

Ia kane ka taiew lehkmen lehburom jong ka Meghalaya Bharat Scouts & Guides, West Jaintia Hills District ka ban sdang naduh ka 12 tarik August 2021 bad pynkut ha ka 16tarik August 2021 lawan ban plie pyrda mynta ka sngi da u W.Lyngdoh, Jt. State Secretary MBS&G, State Headquarter Shillong kum u kongsan ha ryngkat ka jingiadonlang ka Saramai Tariang, District Commissioner, Guides  West jaintia Hills ba long kum ka shongknor jong ka jingialang,  u  Ohiwot Laloo, District Secretary MBS&G West Jaintia Hills,  u Adiam U Bthuh, Jt. District Secretary MBS&G West Jaintia Hills bad ki Scouts Master, Guides Captain.

Ha ka jingialang ba lyngkot jong kane ka sngi laioh ka jingkren maitphang halor kane ka taiew lehkmen na u Adiam U Bthuh, Jt. District Secretary bad ruh ka jingkren ai mynsiem ha ka jingiadei bad ka sngi kyrpang jong ka Ri India na ka Lamisakani Dkhar, Guide Captain, Lisse Pearls Secondary School, Mukhla bad ha ba pynkut u Elvis Dkhar, District Organiser Scouts, West Jaintia Hills u pashat ki kyntien ai khublei.

Ki prokram kyrpang ba la mang ha kane ka 75th Independence Day Week Celebration ki long kum ka jingiakop thoh Essay shaphang u Mahatma Gandhi, ka jingiakop pyniriam ne Fancy Dress kat kum ki riam ki bait u Mahtma Gandhi, ka jingiakop thoh Slogan ha kajingiadei bad ka Independence Day bad kiwei kiwei bad ia ki jingiakop baroh la pynlong ha ka rukom jong ka Online ha kaba ki khynnah Scouts- Guides kin hap ban iashimbynta ne leh na la ki iing ki sem jongki.

U W.Lyngdoh, Jt. State Secretary MBS&G, State Headquarter Shillong haba ai jingkren ha kane ka sngi u la iaroh ia ki bor pyniaid ka Meghalaya Bharat Scouts & Guides, West Jaintia Hills bad kane ka pyni ba hapdeng ka jingtynjuh jong kane ka por ki khynnah Scouts- Guides hapoh ka District ki long kiba iohlad ban pyni ia la ki sap ki phong jongki.

Haba kren ia ka bynta jong ka jingioh laitluid ne Freedom, u ong kum ki nongshongshnong ne ki dkhot ka Bharat Scouts & Guides Movement ngi don shibun ki kam ban leh na ka bynta ka imlang sahlang, kumta kum ha kane ka por u khot bad wer ia ki bor pyniaid ka District ba kin shimkhia ban leh ei ei ha ka jingiadei bad ka pule puthi namar ha kum kane ka por ka don shibun ka jingktah ia ka pule puthi jong ki khynnah khamtam kiba im ha ki thain nongkyndong.