Leh burom ka Sorkar ia kiba la trei shitom ban wad ia ki shi kurim ha Sohra

Syllad | The Rising MeghalayaJune 11, 2025

Ka Sorkar Jylla haka 11 tarik Jylliew ka la pynkup burom ia ki dkhot ka kynhun Search & Rescue Team kiba la trei shitom khlem shongthait ban wad ia ki shi kurim kiba jah rngai kaba lam sha ka jinglap ia ka metiap jong u Raja Raghuvanshi ha ka jingjia kaba la pynkhihwin kaba la jia ha ka thain Sohra.

Ia kane ka jingialang la pynlong hapoh Conference Hall jong u SDO (Civil), Sohra ban leh burom ia baroh kito ki kynhun kiba don bynta ha kaba pynlong ia ka jingwad ia u Raja Raghuvanshi uba la khlad noh bad ka jingdonkti ka kurim jong u ka Sonam Raghuvanshi ha lyndet jong kane ka kam pyniap.

U Myntri ka Tnad Tourism u Bah Paul Lyngdoh haba aijingkren u la kyntu ia ki nongwan shangkai pyrthei ba kin wan da ka mynsiem bad ki jingmut jingpyrkhat kiba khuid, da kaba maham ba yn ym lah shah ia kino kino ki jingleh jingkam kiba beain. U la kyntu ruh ban don ia ka akor ka burom bad ka jingkitkhlieh ia ka kam jngohkai pyrthei hapdeng ki nongshong shnong.

“Ka Sohra ka dei ka ri kaba don iaka mynsiem kaba bha bad ka ri jong ka akor ka burom ka bha. Wat hapdeng ki jingshah kynthoh kiba bun na shabar jong u pud u sam jong ngi, hynrei ka imlang sahlang jong ngi ka ieng skhem, ka la ialam da ka jingiaid rally kaba jai jai bad ka jingthang mombati katba ka la kyrshan borbah ruh ha kaba iadei bad ka jingpynlong ia ka jingwad,” u la ong.

Kaba kham kongsan, u la pynbna ba ka Tnad Tourism kan iatreilang ryngkat bad ki bor synshar ka thain Sohra na ka bynta ban pyndait ia ki kor CCTV ha ki jaka jngohkai kiba kongsan. U la kular ruh ban aijingbit ban tei ia ka jaka kaba biang na ka bynta ki nongdie jingdie harud surok hajan ka jingkieng Mawkdok ka ban kyrshan bad pynsuk ia ki paidbah kumjuh ia kito ki nongshong shnong kiba kamai jakpoh.

U MLA ka Sohra u Bah Gavin M. Mylliem u la shim ia ki nongwan shangkai kum kiba haiing hasem bad u la ban jur ia ka jingdonkam jong ka jingiatreilang hapdeng ka Sorkar, ki Dorbar bad ki nongialam shnong ban pynkhlain ia ki kam jngohkai pyrthei. U la ai khublei kyrpang ruh ia ka Tnad Pulit ka Meghalaya halor ka jingtbit bad ka jingleh ban pynsted ia kane ka kam.

U Bah TW Chyne MDC ka Sohra ha ka jingkren u la iaroh ia ki pulit kiba la lah ban leh palat ia ka jingkhmih lynti jong ki paidbah bad ban jur halor ka jingdonkam ban kynthup kham bha ia ki nongbtin lynti na ka thain ne local guides kumjuh ia ki nongkamai taxi ha ki kam kiba iadei bad ka kam jngohkai.

Na ka liang u Bah Cyril V.D. Diengdoh Director ka Tnad Tourism uba la kdew halor ka jingdonkam ia ki sienjam kiba kongsan ban kyntiew shuh shuh ia ka kam jngohkai pyrthei.

Kiwei pat kiba la aijingkren ki kynthup ia u Bah E.R. Solomon na ka Sohra Region Tourism Association uba la pyrto ia ki sienjam ba la shim da ka Tnad Pulit, SDRF/NDRF, F&ES, Rangbah Shnong ki Volunteer bad kiwei kiwei. U la ban jur ruh halor ka jingdonkam ban pyndait ia ki kor CCTV bad pynbna ia ka jingpyniadoh internet bad ki bynta kiba iadei bad ki jingdonkam ba kyrkieh.

Ha kane ka sngi la sam ia ka song pisa kaba long baroh T.5.4 lak sha ki 36 ngut ki dkhot jong ka Tour Guide Association of Meghalaya kaba kynthup ia ka Central Body, Sohra Unit, local guide bad West Jaintia Hills Adventure Sports & Mountaineering Association, kata kaba long T.15,000 marwei. Katba ia ki dkhot na ka liang ki Tnad Sorkar kaba kynthup ia ka Tnad Pulit, SDRF, Fire & Emergency Services nongtrei na ki Tnad sorkar la sam da ki syrnod kum ka dak ka jingsngewnguh halor ka nuksa kaba ki la pynpaw ha kaba aijingshakri.