Leh burom ka Jowai Blood Bank ia kiba ai snam sngewbha

Syllad | The Rising MeghalayaJune 16, 2025

Ka Jowai Civil Hospital, Blood Bank Center (BBC) Panaliar ha ka 14 tarik Jylliew  ka la rakhe ia ka ‘World Blood Donors Day’ halor ka phang “Give Blood, Give Hope: Together We Save Lives” da kaba leh burom ia kito kiba la bteng noh synniang khlem tyngkai ban pyllait im ia ki para briew lyngba ka jingai snam mon sngewbha.

Haba kren kum u Kongsan ha ka prokram u Additional Superintendent of Police ka District u Ishan Gupta u la ai ka jingiaroh kaba khraw ia baroh kito kiba la wan shakhmat ban ai snam da ka mon sngewbha.

U la ban jur halor ka jingkongsan jong ka jingai snam mon sngewbha ha ka jingshakri ha ka liang ka kiot ka khiah da kaba batai ia ki kum ka bor ha lyndet jong ka jingialeh kaba nang roi ha kaba iadei bad ka jingai snam mon sngewbha.

Haba kdew halor ka jinglong jingman kaba mynta, u Ishan Gupta u la kren halor ka jingjia hap liengsuin kaba dang shen ha kaba 260 haduh 270 ngut ki briew ki la duh ei la ka jingim bad kumba 100 ngut kiwei pat ki la ngat ha ki jingmynsaw bad don hapdeng ka jingshah sumar kaba la banbor ia ka tnad ka koit ka khiah khamtam eh ia ka kynhun aijingsumar.

Ha kane ka prokram la pynlong ruh ia ka jingsnap jar kaba 15 sekhon ban duwai na ka bynta kito ki mynsiem kiba la khlad noh bad na ka bynta ka jingioh bor hapdeng kiba haiing hasem jong ki bad ruh na ka bynta ka jingioh khiah noh kloi jong kito kiba mynsaw.

U Gupta u la iasam ruh ia ka jingjia kaba u la iakynduh ha ka jingim kum u samla da kaba ong, “Ha ka por ba nga dang don hapdeng 15-16 snem ka hymmen jong nga ka la ngat ha ka jingshitom bampong (cancer), u la pynkynmaw kumno ba ka jingsumar  jong ka, ka donkam shibun bha ka snam bad ngi la mad ia ka jingeh ha kaba iadei bad kane ka jingdonkam ba kyrkieh.”

“Kane ka jingjia ka la pynshai kdar ha nga ba haduh katno ka jingkongsan jong ka jingai snam bad kumno ba ki blood bank ki iarap ban pyllait im ia ki para mynsiem briew kaba la pynkylla junom ia ki jingmut jingpyrkhat jong nga,” u la ong.

U Symbud Kongsan u Kingshok Kamal Bora, Co-ordinator CSR Dept. Star cement ha ka jingkren u la iaroh ia ka jingdon ia kane ka mynsiem ban noh synniang bad ban jur ba kum kine ki kam ba bha ki long u budlum ha ka jingshakri ba kongsan ha kino kino ki bynta jong ka jingshakri ha ka liang ka koit ka khiah.U la kren ruh halor ki sienjam kiba ka Star Cement ka la shim na ka bynta ka bha ka miat jong ka imlang ka sahlang.

Ka Dr. I.Khyriem, Sr. Medical & Health officer I/C JCHBC ha ka jingkren ka la kdew halor ka jingkongsan jong ka jingai snam mon sngewbha bad ka jingktah kaba pyllait im ia ki nongpang  bad ha ka jingshakri jong ka tnad ka koit ka khiah.

Na ka liang u Bah Kylli mot Lhuid, dkhot ka Sarot -I- Man committed blood donor u la iasam ia ka jingshem jong u shimet bad pynshlur ia kiwei pat ban wan shakhmat ban ai snam mon sngewbha.

Ia kane ka prokram la pyniaid da Dr. D Lakiang, Medical Superintendent, Jowai Civil hospital ha kaba la ioh ruh ia ka jingkren pdiang na u Williambor Sumer, Lab. Technician bad ka jingai khublei na ka kong Memory Lamin, Staff Nurse.