Lashai ka sngi ka peace rally ka JYF ba duh admission ki khynnah pass matrik ha Kiang Nangbah Govt. HS, kyrshan ka JSM

Syllad | The Rising MeghalayaNovember 4, 2021

Ka Jaintia Youth Federation (JYF) kan pynlong da ka peace rally lashai ka sngi 5 tarik hadien ba duh klas ki khynnah ba pass matrik ha Kiang Nangbah Government Higher Secondary School, Jowai.

Ka JYF kan pynlong ia kane ka peace rally ha ryngkat ki khynnah class XI ki bym pat ioh admission haduh kine ki sngi. Ka JYF ka ong baka rai ban pynlong ia kane ka rally ka long hadien ba u Education Minister bad ka sorkar jylla kim shym la pyni kino kino ki dak ki shin la yn pdiang ne kyntait ia kine ki kynnah ki bym pat ioh admission.

U Joint Director ka tnad pule, Ma LS Lyngdoh haka 8 tarik u Risaw u bnai bala dep ba leit tur ka JYF bad ki khynnah pule haka ophis jong u, ula bthah ban pynpoi iaki kyrteng ki khynnah bym pat ioh klas, pynban kine ki khynnah haduh mynta kim pat ioh admission. Ki khynnah kiba la ai kyrteng ki don haduh 144 ngut na ki shnong bapher bapher.

Ka Jaintia Students’ Movement (JSM) ruh kala ai ka jingkyrshan kaba pura ia kane ka jingiakhih ka JYF. Ka JSM kala pynpaw baka sngewkhia halor kane ka jingduh admission ki khynnah pule bad kala dawa ban pynrung lut ia baroh ki khynnah ki bym ioh admission.