Lashai ka jingialang paidbah ki Pnar ha khappud

Syllad | The Rising MeghalayaJuly 21, 2023

Ka Namdong Block and Laskeiñ Block Border Area Peace Committee kan pynlong ïaka jingïakynduh lang jong ki jaitbynriew Pnar kiba shong ba sah haki thaiñ Border ka Assam bad Meghalaya kiba hap hapoh ka Namdong Block bad Laskeiñ Block.

Kane ka jingialang kan long haka shnong Khanduli haka por 11.00 baje mynstep.

U Chairman ka Namdong Block and Laskeiñ Block Border Area Peace Committee u Aiborlang Shadap uba dei ruh u MDC ka Barato-Mukroh, ula ïathuh ba ka jingthmu jong ka jingïakynduh lang ka long ban wanrah ka jingïatylli bad ka jingïajan ïaki briew Pnar kiba sah haki thaiñ khappud ka Assam bad Meghalaya.

Nalorkata, ban wanrah ruh ka jingïaieid iwei ïa iwei bad ruh ban ïapyrkhat ïa kiwei ki kam ha kaba ïadei ka shongsuk shongsaiñ ki khun ka jait bynriew Pnar kiba sah haki thaiñ khappud ka Assam bad Meghalaya.

Kumta u Chairman ka Committee, ula khot la wer ïa ki nongshong shnong ka Namdong Block bad Laskeiñ kumjuh ki nongshong shnong ka thaiñ Block-1, ki riew rangbah na kiwei ki thaiñ kiba don ka mynsiem kylluid ban wan shim bynta sha kane ka jingïakynduh lang khnang ban shngaiñ ki briew kiba sah haki thaiñ khappud.