Lashai 14 tarik Naitung yn pynkut iaka Behdienkhlam Jowai

Syllad | The Rising MeghalayaJuly 13, 2025

Da ki hajar ngut ki khun Niamtre jong ka Seinraij Jowai ki la iamih paidbah haka Sngi U Blei ban sakhi ïa ka jingrah Khnong Blai ban leit buh ha Pohsawiar bad hadien pat ha madan Moosyiem, Chilliangraij. Ka jingrah la sakhi da ka jingsawa bom, ksing, tangmuri ryngkat ka jingkynhoi risa kaba pynshongshit ia ka sngi.

Ka lehniam Behdieñkhlam kaba la poi mynta sha ka sngi kaba lai, lashai ka sngi (Naitung 14) kan long ka sngi kaba khatduh bad yn pynkut ïa ka ha pung kyntang Aitnar.

Ha kane ka sngi kaba lai (Naitung13), la sdang ïa ka lehniam naduh ka por mynstep da kaba pynïeng ïa ka Dienkhlam ka Bon ha ïung Blai jong ki jait Rangad ha Chilliangraij. La pynïeng ruh ïa ka Dienkhlam ka Doh bad ki Dienkhlam rit ha manla ki thliew ïing jong ki riewngeit Niamtre.

Ki samla kynthei bad ki longkmie ha ki khor ki khriam tynrai ki la iamih shongshit ban sakhi ia ka jingshad bad ka jingrah Diengkhlam da ki Kmai Raij, katba ki Khonraij kila rah iaka Khnong Blai pat la rah sha Pohsawiar.

Shuwa kane haka por mynstep ki Khonraij kila shaw ïaka Symbud Khnong na jaka kyntang na Loomsooiung ban pynïeng ïa ka ha Khliehshnong ha dong Chilliangraij.

Ha Pohsawiar, u Dolloi ka Elaka Jowai, Ma Puramon Kynjing, u la aiti ïa u Khlong ha u Kñi ka kur Nikhla ban pyndep ïa ka niam ka rukom. Hadien kane, la rah ïa ka Khnong Blai sha madan Moosyiem ha kaba la bteng ïa ka niam.