Lap ki pulit ia ka raincoat ba khah jaboh haba bteng ban wad ia ka kurim u nong Indore ba shah pyniap

Syllad | The Rising MeghalayaJune 5, 2025

Haba bteng ban pynlong ka jingwad ia ka Sonam kaba dei ka kurim jong u lanot ba shah pyniap u Raja Raghuvanshi ha kaba ia ka metiap jong u la lapdien na ka jaka riat kaba jylliew ha kshaid Weisawdong, ki pulit ha 4 tarik Jylliew ki la lapdien ia raincoat kaba khah jaboh na katei ka jaka.

U Superintendent of Police ka East Khasi Hills, u Bah Vivek Syiem u la pynthikna halor ka jingioh tam ia kawei ka raincoat kaba khah jaboh, hynrei u la ong ba ka dang kloi than ban pynthikna la ka don jingiadei ne em bad ka Sonam Raghuvanshi, kaba dang jah rngai haduh mynta.

“Ngi la ioh tam ia ka raincoat kaba jhieh. Ki don ki dak khah jakhlia, hynrei ngim pat lah ban pynthikna la kine ki dak ki dei ne em ka dien snam tad hadien ba ngin leh ia ka forensic test ban lah ban pynthikna,” ong u heh pulit.

Ha kaba iadei bad kane ka jingwad kaba dang bteng, u Bah Vivek u la ong ba ha kane ka sngi ki kynhun bapher bapher ki la khynra lut ia ki jaka kiba don ha ka thain Weisawdong hadien ba ka la don noh ka jingshah pynthut namar ka jingther jong u slap. Watla katta kane ka jingwad ka la bteng sha ki jaka ba marjan.

Ka jingioh tam ia kane ka raincoat ka la wan long ruh shi sngi hadien ba ki pulit ki la lapdien ia ka wait ba la pyndonkam ha kaba pyniap ia u Raja Raghuvanshi ha kaba ia ka metiap jong u la lap na ka jaka riat ha kshaid Weisawdong hadien ba u la jah rngai ha ryngkat ka kurim jong u ha ka jingwan shangkai sngewbha sha Sohra.

“Ngi la ioh tam ia ka wait kaba dang thymmai ba la pyndonkam tang na ka bynta kane ka kam pyniap na kshaid Weisawdong,” ong u Superintendent of Police ka East Khasi Hills, u Bah Vivek Syiem

Da kaba pynthikna ba ka dei ka kam pyniap, u SP u la ong, “Une u nong Indore (Raja) u la shah pyniap, kam don kano kano ka jingkylli da kumwei pat, bad ngi la register case kam pyniap bad ka jingpynduh ia ki sakhi satar. Kam don ka jingartatien ba ka dei ka kam pyniap. Ngi hap ban wad ia ka daw kaba sha lyndet jong kane.”

U la ong ruh ba ia kane ka case ki la shim kum ka kam kaba hakhmat eh bad ka kynhun Special Investigation Team (SIT) ba la khlieh da u Bah SP (City) Bah Herbert Kharkongor ka la iaid shakhmat ban pynlong ia ka jingtohkit halor kane ka jingjia.

Ia u Bah Herbert yn iarap lang da ki sawngut ki Deputy Superintendent of Police (DSP)-DSP (Crime), DSP (City), DSP (Operation) bad SDPO Sohra nalor arngut ki Sub-Inspector.

Kine ki shi kurim kiba dei na Indore, Madhya Pradesh kila wan poi ha Nongriat ha ka 22 tarik Jymmang la iohi khatduh ha ka 23 tarik Jymmang hadien ba ki la mih na Shipara Homestay ryngkat bad uwei u nongialam lynti na ka thain. Ia ka scooty jong ki kaba ki shu wai la lap na Sohrarim ha ka 24 tarik Jymmang hadien ba la sdang ban pynlong ia ka jingwad.