Lap ka TUR ba jyrsieh ka bamsap naka pisa khlam COVID-19 ban kyrshan iaki nongbylla sngi

Syllad | The Rising MeghalayaMay 22, 2021

Ka Angela Rangad nongialam jong ka Thma U Rangli-Juki (TUR) kala kynnoh ba jyrsieh ka jingbam sap jong ka ka sorkar lyngba ka pisa ban kyrshan pisa iaki nongtrei bylla kiba duh ban bylla sngi naka jingkhangdam ne Lockdown ban tem iaka jingpur ka khlam COVID-19 ha u snem ba ladep.

Ka Kong Angela kala ong ba lyngba ka jubab RTI la lap ba da ka klur tyngka ka pisa kam shym la poi sha u nongbylla sngi, nongdie madan, nongniah taxi bad kiwei kiwei wat hadien ba ki nongbylla kila dep ban ai kyrteng ha ki ar tylli ki lad jingiarap pisa ka sorkar, kata Chief Minister’s Relief Against Wage Loss (CMRAWL) bad kawei pat naka tnad Labour lyngba ka skhim Meghalaya Building & Others Construction Workers Welfare Board (MCBOCWB).

Ka Kong Angela kala ong ba shen kin ujor sha ka Labour Department Government of Meghalaya.

“Kane ka jingiarap kyrshan pisa ka sorkar Meghalaya ka dei tang ia kiba trei bylla sngi kiba ym lah shuh ban leit trei leit ktah namar ba ka sorkar ka phah ban shongkhop hapoh iing naka jingkhang dam (Lockdown), hynrei kaba lyngngoh kane ka pisa kam shym la poi satia sha ki nongbylla sngi,” la ong ka kong Angela bad bynrap ba ki nongbylla thik pa thik kila dep pyndap iaki phorm katkum ka jingbthah jong ka sorkar lyngba ki ophis jong ki Rangbah Shnong jong ki shnong bapher bapher.

Ka sorkar kala pynlut palat 40 klur ka pisa ban kyrshan ia u nongbylla sngi lyngba ki ar tylli ki lad jingiarap kata ka Chief Minister’s Relief Against Wage Loss (CMRAWL) bad na ka tnad Labour kaba kynthup iaka jingiarap pisa T .5000 bad T.2100.

Haduh 135241 kila register haka CMRAWL bad 25684 haka tnad Labour.