Lap ka KHADC ba kylla ktem bymman ka jingtei kaba T. 14 klur hajan ka pung Umiam

Syllad | The Rising MeghalayaAugust 28, 2025

Ka kynhun na ka Khasi Hills Autonomous District Council (KHADC) ba la ialam da u Executive Member uba dei peit ia ka council assets u Bah Pynkhraw Kharjahrin ha ka 27 tarik Nailar ka la pynlong ka jingleit jurip ia ka Khasi Traditional & Cultural Centre, ka project ba T.14 klur kaba don ha jingkieng Kalong hajan Pung Umiam ha kaba ka la shem ba ka la kylla long pynban kum ka ktem na ka bynta ki kam sniew kam smeh.

Kane ka jingtei kaba kynthup ia ki hall, ki kamra, jaka bam, ki iing (cottage) ka dang sahteng khlem da pyndep bad ka la nangsniew shuh shuh namar ka jingpynslem.

U Bah Pynkhraw u pyntip ba ha kane ka jingleit jurip, la lap ba kine ki jingtei ki la kylla long pynban ka ktem na ka bynta ki kam sniew bad ki kam awria bad kaba la pynmih ia ka jingsngewkhia halor ka jingktah jong kane ka project ia ki nongshong shnong.

U la ong ba ia kane ka project la sdang naduh u snem 2018, hynrei la sangeh ban pyniaid shakhmat namar ka jingujor da ka Meghalaya State Pollution Control Board (MSPCB). Ka jingjia pluh ding ka la pynjulor ruh ia ka bynta jong ka jaka bam katba kine ki iing ki la don ha ka jinglong jingman kaba i sangsot ban peit.

Une u EM u la pynpaw ruh ba ka jingbteng ia kane ka project ha kaba kum kane ka jinglong jingman kan ban khia shibun ia ka pla tyngka jong ka Council.

“Hynrei, hapoh ka Executive Committee (EC) kaba thymmai, yn pyrshang ban shim ia ki sienjam khnang ban pynthikna ba baroh ki project ki dei ban pynmyntoi ia ki nongshong shnong bad kyntiew ia ka jingpynmih khajna,” u la ong haba kular ba ka EC kaba thymmai kan pyntreikam ia ki project ha ka lynti kaba janai da kaba pynduh ruh ia ka jingdonkam bei tyngka kaba na bar.

Halor ka Public Interest Litigation (PIL) kaba iadei bad ka jingtei hajan ka pung Umiam, u Bah Pynkhraw u la ong ba ka EC barim ka la pulom ban buddien ia kane ka kam.

“Ka Iingkashari ha ka jingshim bishar ka la bthah ba ki jingtrei kiba la don lypa ki dei ban bud ryntih ia ki kyndon kiba iadei bad ka mariang, hynrei kane ka project ka dang sahkut sah,” u la ong.

Kat kum ka jingong jong u, ka EC kaba thymmai ka angnud ban pynbeit ia kine ki jingeh bad ban pyniaid shakhmat ia kane ka project.