Lap ia u nongdih drok ba thiah iap ha ryngkat u thyrnia ha painkhana ka petrol pump

Syllad | The Rising MeghalayaMay 24, 2025

Uwei u suba nongdih drok u la khlad noh hapoh ka painkhana jong kawei ka petrol pump kaba don ha Norbong, Ri Bhoi District ha ka 22 tarik Jymmang ryngkat bad u thyrnia injek.

U Superintendent of Police ka Ri Bhoi u iathuh ba une u briew u bym lah ban ithuh bad uba don hapdeng ka ta 30-35 snem u la khangkut ialade hapoh ka painkhana jong ka Meera Petrol Pump ha Norbong, Ri Bhoi District ha ka por kumba 5:30 janmiet.

U la ong ba hadien ba la kyndang ia ka jingkhang jong ka painkhana la lap ia une u briew hapdeng ka jingbym tip briew ha ryngkat u thyrnia ha ka kti ka mon jong u. Hadien kane la pynkit noh ia u mar mar shapoh Byrnihat PHC ban ioh jingiarap hynrei na ka liang ki doktor ki la pynbna ba u la khlad.

Hadien ba la pyndep ia ki jingdonkam baroh ia kane ka metiap la pynkynriah noh sha Civil Hospital, Nongpoh ban pyndep ia ka post mortem.

Une u lanot uba don kumba 5.5 phut ka rynieng, u dei uba kham dum sniehdoh, uba pdeng briew bad u phong da ka patlun jean rong blu, ka T Shirt rong soh bad u don ka jingdro tattoo ha ka ksangkti jong u.