Lap ia u bom siat tank bym pat bthei na ka jingtih nongrim ïing ha Mawlynrei

Syllad | The Rising MeghalayaMay 9, 2024

Ki bor pulit ha ka 8 tarik Jymmang ki la lapdien ia uwei u bom jong ki tank shipai u bym pat bthei na ka jingtih nongrim na ka bynta ka jingtei hapoh ka shnong Mawlynrei Nonglum, Shillong.

Ia une u bom u bym pat bthei bad uba don ia ka jingjrong kaba 13 inshi bad 12 inshi ka jingpyllun la lapdien ha ka jaka pyntrei jong ki riew shimet.

Hadien ia une u bom la aiti noh sha ka kynhun Bomb Detection and Disposal Squad (BDDS) jong ka Tnat pulit ka Jylla ba kan buh bha ha ka jaka kaba shngain bad ban pynlong ia ka jingjurip bniah, ong u Superintendent of Police ka East Khasi Hills u Rituraj Ravi.

Mynta ka jingtohkit bniah ka la iaid shakhmat ban lapdien ia ka tynrai jong une u bom kumjuh  ban pynduh noh ia ka bor ka jong u, ong une u heh pulit.