Lap ia ka metiap u samla na Meghalaya napoh ka hotel ha Guwahati, suba buaid drok

Syllad | The Rising MeghalayaJuly 30, 2024

Ki bor pulit ki la lapdien ia ka metiap jong uwei u samla 30 snem rta uba dei na Meghalaya ha ka rukom kaba i pher napoh ka Hotel Tibetan ha Paltan Bazaar, Guwahati haka 30 tarik Naitung.

Hadien la ithuh ia une u briew uba la khlad noh kum u Sunny Nongrum uba shong ba sah ha Mawpun kaba hap hapoh Pynthorunkhrah police station, East Khasi Hills.

Ka jinglapdien ia ki song drok bad u nar injek ka la pynlong ia ki pulit ba kin suba jur ba une u samla u la khlad noh namar ka jingbuaid drok, bad la ong ruh ba une u samla u la don hapoh kane ka hotel naduh ka 27 tarik Naitung.

Na ka liang ki pulit ki la pynkit noh ia kane ka metiap shapoh Gauhati Medical College & Hospital na ka bynta ban leh ia ka post-mortem.