Lap ia ka metiap u Raja na Weisawdong Sohra, dang wad ia ka kurim; thung da ka SIT ban tohkit ba suba shah pyniap

Syllad | The Rising MeghalayaJune 2, 2025

Hadien ka jingwad kaba la neh phra sngi kynthih ia ki shikurim ki nong Indore kiba jah rngai naduh ka 23 tarik Jymmang ha ka thain Sohra, ki pulit haka sngi Nyngkong ki la lap ia ka metiap ba la pyut jong u Raja Raghuvanshi na ka jaka riat kaba don shapoh jong ka Weisawdong Parking Lot ha Riat Arliang katba ia ka kurim jong u ka Sonam ym pat shym la lapdien satia.

U Superintendent of Police ka East Khasi Hills, u Bah Vivek Syiem lyngba u kyrwoh u la ong ba la lapdien ia kane ka metiap ba la pyut lyngba ka drone jong ki pulit ha ka por kumba 11:48 mynstep ha ka jingwad ba la iatreilang da ki bor pulit, State Disaster Response Force (SDRF), Special Operation Team (SOT) bad na ka West Jaintia Hills District Adventure Mountaineering Club.

“Namar ka jinglong riat ka jaka kumta ia ka metiap la wanrah noh sha Parking Lot ha kaba la pyndep ia ka jingkhmih bniah da ka Magistrate Kong Adiel R. Kyntan, MCS, Executive Magistrate ka Sohra ha ka por 3:30 bad 4:00 janmiet ha ka jingiadon lang ki sakhi ba laitluid na ka thain bad kiba haiing hasem jong une u lanot kiba la pynthikna ba kane ka metiap ka dei jong u Raja Raghuvanshi lyngba ka jingdro tattoo kaba don ha ka kti ka mon kaba thoh ‘Raja.’

U heh pulit u pyntip ruh ba na katei ka jaka ba la lap ia ka metiap la ioh lap ruh ia kawei ka sopti shirt kynthei kaba lieh, shi sla u Pentra 40, ka bynta jong ka LCD screen jong ka Vivo mobile phone bad ka smart watch na ka kti jong une u lanot.

Hadien la pynkit noh ia kane ka metiap shapoh NEIGRIHMS, Shillong ban leh ia ka post mortem khnang ban lap ia ka daw tynrai jong ka jingiap.

U Bah Vivek u pyntip ba ki  la thaw ia ka Special Investigation Team (SIT) ban pynlong ia ka jingtohkit kaba bniah halor kane ka jingjia da kaba pynpaw ruh ia ka jingsuba kaba jur ba ka lah ban dei ka  jingshah pyniap.

Watla katta u la ong ba kim pat shym la ioh jingtip ei ei ha kaba iadei bad ka kurim jong une u lanot ka Sonam Raghuvanshi, hynrei ka jingwad ka dang iai bteng wat hapdeng ka jingpynthut jong ki bor ka mariang bad ka jinglong jingman jong ki jaka kiba shem jingeh.

U la ong ruh ba ka jinglapdien ia kane ka metiap ka la wan long lyngba ka jingtrei shitom da ki kynhun bapher bapher kiba iashim bynta ha kane ka jingwad kaba khlem shongthait wat hapdeng kiba bun ki jingeh kiba iakynduh.

Katkum ka khubor pulit ha ka 22 tarik Jymmang kine ki shijur kiba dang shu pyndep shen ia ka jingiathoh shongkurim, kata u Raja bad ka Sonam ki la wan poi ha ka shnong Mawlakhiat (Elaka Mynteng) da kawei ka scooty kaba shu shim wai ban leit jngoh ia ka jingkieng jri ne ka ‘Double Decker Root Bridge’ ha Nongriat. La synran lang ia ki da u nongialam lynti uba dei u trai shnong u Bah Bha Wansai bad ki la pynlut ia ka miet hapoh Shipara Homestay ha Nongriat. Ki la mih noh ha ka 23 tarik kaba bud ha ka por 6 baje mynstep da ka jingthmu ban wanphai sha Mawlakhiat. Hynrei ym shym la lah ban pynthikna ban don kiba iohi ia kine ki shijur ba kin iaid kjat na Nongriat sha Mawlakhiat lane ba kin wan shim ia ka scooty na ka jaka pynieng ha Mawlakhiat watla ka jingdon jong ki nongwan shangkai ka long kaba bun bha.

Ha ka 24 tarik Jymmang ha ka por 9 baje mynstep, u Sordar ka Sohrarim u la pyntip ha kaba iadei bad ka scooty kaba la shu iehnoh, bad ha ka jingbuddien la ioh jingtip shaphang kitei ki shijur lyngba ka E-Challan ha ka 25 tarik u Jymmang ha ka por 2:30 mynsngi. Na ka liang kiba haiing jong kine ki shijur kila ujor da ka ejahar halor ka jingjah ka jong ki bad la rejistar ia kane ka ejahar, la ong u ADC ka Sohra.