Lahduh ka St. Alfred SS ha ka lympung ialehkai Sports Inter School Meet 2024 u DSO Ri Bhoi

Syllad | The Rising MeghalayaMay 12, 2024

Ka St. Alfred Secondary School ka la ioh ban rah ia ka nam lahduh napdeng ki 30 tylli ki skul kiba la wan iashim bynta ha ka lympung  ïalehkai sports District Level Inter School Athletic Meet 2024 jong u DSO Ribhoi kaba la kut noh ha ka 11 tarik mynta u bnai.

Katei ka lympung ïalehkai sports kaba 3 sngi ka la long da shisha kaba itynnad naba bun ki khynnah skul ki la ïa shim bynta shitrhem ban ïa khun tyngeh ban khur ïaki takma naka bynta ka skul. Ha kane la sngi pynkut naka liang ki bor pynïaid ki la sam ïaki takma bad ki trophy ha ryngkat bad ki syrnod sha baroh ki nong jop ha ki jingiakop bapher bapher kiba kynthup naduh ki jingiakop mareh jong ki kynhun bad ki jingïakop mareh shimet bad naka liang ka ophis Jong u DSO ka la pynkup syndon ïa ka Skul Alfred Secondary school kum ka skul kaba la khur shibun ki takma.

Ha kane ka sngi pynkut la wan ban pynhap noh ïaka lama da u bah Raja Brahma, Addl. Deputy Commissioner ka Ribhoi kum u kongsan, ha ka jingïadon lang ka Kong PL Nonglait, District School Education Ophisar, Ribhoi, Bah Bobby L Nongbet, District Sports Ophisar lem bad kiwei kiwei.

U Raja Brahma, ADC ka Ribhoi haba ai jingkren ha katei ka sngi pynkut u la ong ba ka jingïalehkai Sports ka dei ban long kawei naki mat kaba donkam eh haka jingim jong ngi ki briew khamtam eh ïa ki khun samla kiba dang don hapdeng ka jingpule. U la ong ruh ba ka jingïalehkai sports kam dei ba ka ai jingïarap tang ïa ka koit ka khiah, hynrei ka ïarap ruh ban pynproh ïa ka jingmut jingpyrkhat bad ki khynnah pule kiba ju pynmlien ban ïalehkai ki ju lait na ka jingklumar jingmut.

Nalor kata ula kyntu ruh ïa baroh ki khynnah skul ba kin pynmlien ïalade ban ïalehkai sports namar ka jingpynmlien ban ïalehkai sports kan pynlait na shibun ki jingsniew bad kumjuh ka pynproh ruh ïaka jingmut jingpyrkhat.

U Raja Brahma, u la ai khublei ruh ïa ki Khynnah skul kiba la ïoh ban khur ïaki takma haki jingïakop bapher bapher ha kajuh kapor u la kitbok ruh ïa kiwei ki bym shem la lah ban jop ba kim dei ban duh mynsiem, hynrei ki dei barabor ban don ïaka mynsiem ban nang ïai trei shitom khnang ba kin lah ban ïalehkai kham bha ha kiwei pat ki sngi.

Kumjuh na ka liang ka ophis u District Sports Ophisar ka la pyntip ruh ba ki nongjop ha kane ka lympung kin sa ïoh ïaka lad ban pyntriem shuh shuh ïalade ha kine ki sngi ki ban wan ha shwa ban leit mihkhmat naka District sha ka State Level Inter school Athletic meet 2024 ka ban sa long ha Nongbah Shillong.