Lah ban ym pat mih rai na ka jingiapynbeit pud namar ka elekshon ha Assam: Paul

Syllad | The Rising MeghalayaMay 30, 2025

U Myntri ka sorkar jylla uba bat ruh kum u Chairman ka Regional Committee na ka bynta ka West Khasi Hills, u Bah Paul Lyngdoh haka 29 tarik Jymmang u la ong ba watla na ka liang ka jong ki, ki la dep ban pynkhreh ia ki kot ki sla ha kaba iadei bad ka jingiakren pynbeit pud bad ka Assam, hynrei ki lah ban ym poi sha ka jingshim rai namar ka jingdon ka elekshon ha Assam.

Haba kren sha ki lad pathai khubor, u Bah Paul u la ong ba ia ka kaiphod ka committee jong u ha kaba iadei bad ka kam iakajia pud la dep ban pynkhreh ban aiti sha ka sorkar jylla, bad kaba sah ka long tang ban leit jurip lang ia ki jaka ha ka thain Langpih.

“Ka jubab na ka liang ka Assam kam pat shym la wan bad lehse namar ka jingbunkam ha kaba iadei bad ka jingpynlong ia ka elekshon Panchayat bad ka jingpynkhreh na ka bynta ka elekshon sha ka iingdorbar thaw ain ka jylla Assam. Namar ka elekshon ka la ha jingkhang kumta lehse kin ym pat kwah ban iaid shakhmat ne shim kano kano ka rai kaba kongsan namar ka lah ban ktah ia ki nongjied pyrshah ia ka jingsynshar kaba mynta.

Haba kylli, u Bah Paul u la ong, “Em, ha ka jingshisha ka kaiphod jong ngi ka long kaba la pynkhreh. Ka dei tang ka jingleit jurip sha Langpih ia kaba ngi la iamynjur ha ka jingialang kaba ngi la iakynduh khatduh ha hotel Pinewood, bad ia kane ym pat lah ban rai namar kitei ki daw kiba nga la kdew.”

“Ka jingiakren kan dang bteng biang, hynrei ngim don pat ia kano kano ka jingkhmih lynti ia ka jingmih kaba heh ne ba kyrpang ka ban jia shwa ban kut ki kam kiba iadei bad ka elekshon,” u la ong.