La tah iaki number dukan ha Iawmusiang | Wer iaki trai dukan ban kohnguh iaka adong COVID

Syllad | The Rising MeghalayaJune 20, 2021

Hadien ba ka bor synshar district West Jaintia Hills District kala ai lad ban plie iaki dukan haduh 20 percent ha ki iew ki hat, ka dorbar shnong Tympang Iawmusiang, Jowai kala tah iaki number ha ki dukan kiba don ha poh u pud u sam jong ka haka sngi Robibar.

Kine ki iew kiba la shah ban plie 20 percent ha Jowai ki long ha lawmusiang, CNI Market, lawchyiap (JPC Market) bad lawthymme, Ladthalaboh, Jowai kiba hap hapoh ka jingpyniaid ki Market Committees naduh ka por 9.00 AM haduh 3.00 PM.

Ki dukan kiba lah ban plie ki dei kiba don ia u number:

Haka sngi Nyngkong: Kiba don ia u number 1 & 4
Haka sngi Balang: Kiba don ia u number 2 & 5
Haka Sngi Thohdieng: Kiba don ia u number 3 & 6

Ka Dorbar Shnong Tympang Iawmusiang Jowai kala dep ban tah ia kine ki number ha ki biar jong ki dukan bad la kyntu iaki trai dukan ban bud ryntih iaki jingpynbeit. Ki trai dukan ki lah ban leit peit iaka number ka sngi ba ki dei ban plie bad nakaliang ka dorbar shnong Tympang kala ong ba kan pyndep ia kane ka kam tah number shibit miet ha baroh ki dukan.

Shuh shuh ka Ladthadlaboh Dorbar Shnong ruh kala dep ban tah iaki number ha ki dukan bapher bapher.

Ka Dorbar Shnong Tympang kala ong ba ki dukan die lang ne wholesales ruh ki kynthup lang ha kane ka jingpynbeit thymmai bad kin plie katkum ka sngi ba dei u number jong ki.

Kane ka juh ka rukom kanlong ha kiwei kiwei ki iew ha sor Jowai baroh.