La shah iaid kali na surok bah NH-6 ha Lumshnong hadien ka jingshlei um

Syllad | The Rising MeghalayaMay 31, 2024

U Deputy Commissioner uba dei ruh u Chairman ka District Disaster Management Authority (DDMA), East Jaintia Hills District u la weng noh ia ka hukum khang iaid kali lyngba ka surok bah National Highway-6 ha Lumshnong.

U la ong ba katkum ka hukum ba la pynmih ha ka 31 tarik mynta u bnai la ong ba ia ka jingmaramot ia ki bynta jong ka surok NH-6 hapoh Lumshnong la lah ban pyndep da ka National Highway Authority of India (NHAI).

Kumta ruh la weng noh mardor ia ka hukum kaba la pynmih ha ka 30 tarik kaba la khang pyrshah ia ka leit ka wan jong ki kali lyngba kane ka surok kaba la shong synjor namar ka jingther jong u ‘lapbah bad ka jingshlei um.

Lah ban kdew ba ka jingshlei um bad ki jingjia twa khyndew ha lynter kane ka surok NH-6 ki dei kiba ju jia khah khah bad kiba wanrah ka jingeh kaba khraw ia ki nongleit nongwan, kata kynthup naduh ki kali rit haduh ki kali heh kiba leit sha kiwei pat ki jylla jong ka thain shatei lammihngi, kaba kynthup shapoh Mizoram, Tripura, Manipur bad Assam.