La sdang iaka jingai jinghika shet cake ha Jowai

Syllad | The Rising MeghalayaNovember 8, 2023

Ka Greta Solutions Training Academy kaba don ha Newhill Loomsooiung, Jowai lyngba ka jingkyrshan ka Meghalaya State Skills Development Society (MSSDS) jong ka tnad Labour jong ka sorkar Meghalaya ka la plie iaka training ne ka jingai jinghikai iaki samla haka kam shna Cake ne Craft Bakery.

Ha kane ka jingai jinghikai la don 30 ngut ki samla na kylleng ka West Jaintia Hills District kumjuh na East Jaintia Hills District ki ban shah pyntbit haka kam shet Cake na ka bynta Lai bnai kynthih.

Ia kane ka jingai jinghikai la plie iaka da u Deputy Commissioner ka West Jaintia Hills District u Bah BS. Sohliya haka jingdonlang u Bah FG. Syngkon Functional Manager DCIC, West Jaintia Hills District, u Skill Development Officer West Jaintia Hills District u Bah Lambormi Suchen, haka jingialang kaba la pyniaid da ka Kong Heileen A. Diengdoh Greta Solutions Training Academy haka phyllaw ka jaka ai jinghikai.

U Deputy Commissioner u Bah BS Sohliya ula ong, haka jingiaid lynti jong u kum u DC jong ka West Jaintia Hills District, u shem ba ki samla ka West Jaintia Hills ki long kiba minot bad don ka mynsiem trei shitom.

Ula ong kajuk mynta kamdei shuh ka juk kaba suk ban ioh kam ioh jam hynrei hap ban iaksaid bad leh hi dalade ialade kumno ban ieng hala ki kjat la jong ban kamai na bynta ialade bad iaka iing ka sem.

Ula kyntu iaki 30 ngut ki samla ba kin minot bad tista ban wan sha ki jingai jinghikai bad ban pynleit jingmut bad lada don kano kano jingeh bad bym sngewthuh long kiba kloi ban kylli jingkylli.

Ula kyntu ruh ia kiwei de ki samla shynrang bad kynthei ba kin wan shakhmat ban shah pyntbit ha kiba bun ki jait jinghikai ba la mang kyrpang na bynta jong ki.

U Bah FG. Syngkon Functional Manager DCIC, West Jaintia Hills District, ula batai lyngkot shaphang ka skhim Prime Minister Employment Generation Programme (PMEGP) kaba dei ka skhim jong ka sorkar pdeng bad na kane ka skhim ka ai iaka subsidy kaba haduh 35% bad ka jingiarap kan wan lyngba ka DCIC.

Ula kyntu iaki samla ba ynda ki la pyndep ia kane ka jinghikai ban wan sha ophis DCIC ban ialeh ne aplai iaka PMEGP namar kane ka skhim ka ai jingiarap ia kito kiba kwah ban ieng ha la ki kjat la jong.

U Skill Development Officer West Jaintia Hills District u Bah Lambormi Suchen, ula ong ha West Jaintia Hills District haduh mynta la lah ban pyntbit kumba 600 tam ngut ki samla bad na kine 400 tam ngut dei kiba la lah ban seng kam lajong bad haba khein khyllum iaka jingioh ne ka jingmih ka jong ki, ka la kot sha ka 24 lak tyngka shibnai.