La sdang ia ka VKSA ha West Jaintia Hills ban kyrshan ia ki nongrep buit thymmai

Syllad | The Rising MeghalayaMay 30, 2025

Ryngkat bad ka ri baroh kawei, ka Krishi Vigyan Kendra (KVK), Jaintia Hills haka 29 tarik Jymmang kala sdang iaka Viksit Krishi Sankalp Abhiyan ne ka jingialap paidbah ban pynsngewthuh iaki paid nongrep iaki buit stad thymmai halor ka rep ka riang bad ri jingri bad kumjuh ruh iaki skhim bapher bapher jong ka Sorkar pdeng.

Ia kane ka jingialap paidbah ha baroh kawei ka ri la wanrah da ka Ministry of Agriculture and Farmers Welfare ryngkat ka jingiatreilang ka Indian Council of Agricultural Research (ICAR).

Kane ka jingialap paidbah ka thmu ban khring kumba shi klur haduh shi klur shiteng ki nongrep na ki 700 tylli ki district ha ka Ri lyngba ki 2000 tylli ki kynhun kiba kynthup ïa ki Scientists jong ka ICAR bad Krishi Vigyan Kendras (KVK) ha ryngkat ka tnat Agriculture jong ki Sorkar Jylla.

Ia kane ka Viksit Krishi Sankalp Abhiyan la plie da ka kongsan ka Director of Agriculture, Meghlaya ka Kong JC Lyngdoh, ka Joint Director of Horticulture haka jingdonlang ka Kong B. Mylliemngap, u Principal Scientist ATARI Zone VII Dr AK Singha, ki nongrep nalor kiwei kiwei haka jingialang kaba la long ha phyllaw ka ophis KVK, West Jaintia Hills District.

Ha Rilum Jaintia iaka jingpynshai paidbah yn pynlong haki 736 tylli ki shnong lyngba ki 21 tylli ki kynhun kiba kynthup iaki Scientists na ICAR, Central Agricultural University bad Krishi Vigyan Kendra (KVK), na ka tnat Agriculture & Farmers’s Welfare, Animal Husbandry & Veterinary, Fisheries nalor ki nongrep kiba la paw.

Ka kongsan Kong JC. Lyngdoh haka jingkren kala ong kane ka Abhiyan ka long kum ka sienjam kaba kongsan jong ka sorkar ban ithuh ia u synniang jong ki nongrep bad ban wanrah iaka jingshong shngain haka ioh ka kot jong ki.

Kala kyntu jur ruh iaki saiantis ki ban leit ialap sha man ki shnong ba kin pynkhlain bha iaka jingnang jingtip shaphang baroh khoit ki jait skhim jong ka sorkar India bad ha kajuh ka por ka kyntu ruh iaki nongrep ban shim ia kane ka kabu ba la iarap da ka sorkar.

Kala batai ruh halor ki skhim bapher bapher jong ka sorkar India ba la ai shaka sorkar Meghalaya ban iarap iaki nongrep ka district.

Katba ka Kong B. Mylliemngap kala ong kane ka Abhiyan ka long kum ka jingkieng kaba pyniasoh iaka saian bad ka jingrep lyngkha, kaba mut ki saiantis bad ki nongwad bniah ki leh ia kaei kaba kidei ban leh hapoh ki Lab bad ban pynpoi pat shaki lyngkha jong ki nongrep.

Ha kane ka sngi kala don ruh ka jingbatai bniah shaphang ka rep ka riang bad ka kam ri jingri da ki riew shemphang ba kynthup Dr. H Rymbai Senior Scientist ICAR, Dr. Ferdinee Dhar AH&VO, Jowai, Kong Phida Lyngdoh ADO, Thadlaskein, Kong Ridalang Wahlang W. Rangad HDO Thadlaskein bad Kong M. Mawlong SMS Plant Protection.