La pynngat containment zone iaka Kynshi Pyllun, Mairang Civil Sub-Division

Syllad | The Rising MeghalayaSeptember 16, 2021

U Sub-Divisional Magistrate ka Mairang Civil Sub-Division, Mairang haka sngi Palei ula pynngat containment zone iaka Kynshi Pyllun, Mairang Civil Sub-Division hadien ka jingiaikiew ka jingiabit iaka jingpang khlam COVID-19.

Ki shnong kiba shah pynngat haka containment ki kynthup ia ki shnong Kynshi Mawria, Kynshi Bangla, Kynshi Raishan, Kynshi Mawteijrong, Kynshi Mawtadain bad Kynshi Mawphanain.

Katkum kane ka hukum, yn ym shah iano iano ruh ban rung ha katei ka Containment Zone lait noh ki nongtrei jong ka tnat ka koit ka khiah bad kito kiba la ioh jingbit na u Incident Commander ba dei peit bad baroh ki nongshongshnong ki dei ban shong khop ha la iing lait noh ki nongrep bad kito kiba don bynta bad ka kam bylla 100 sngi. Ki nongshong shnong kiba leit rep leit riang kidei ban leit beit tang sha ki lyngkha rep bad wanphai pat sha la iing khlem da iakhleh bad kiwei pat bad ha kaba iadei bad ka jingpyntrei ia ka kam bylla 100 sngi, ki Secretary jong ki VEC ki dei ban pynthikna ba baroh nongtrei kidei ban bud ryntih ia baroh ki protocol jong ka sorkar ha kaba iadei bad ki lad iada na ka khlam COVID-19.

Shuh shuh, baroh ki dukan kin khang lut lait noh ki dukan die marbam ki ban plie katkum ka por ban pynbeit da ki bor pyniaid shnong, ki CCMT bad u Incident Commander.

Kino kino ki kam shna iing shna surok ki dei ban sangeh noh mardor bad baroh ki ophis ne ki bank kiba don ha u pud u sam jong kane ka Containment Zone ruh kin ym plie katba kane ka hukum ka dang treikam.

La kyntu ia baroh ki paidbah ba ki dei ban da deng mask tikna, kim dei ban iakhleh bad kiwei pat bad ki dei ban sngapthuh bha lada ki don kano kano ka jingsngewshitmet ne jyrhoh ne dap shadem bad jynjar ban ring ne pynhiar mynsiem. Ki dei ruh ban leit shimbynta ryntih ha kino kino ki jingtest ia kiba ka tnat ka koit ka khiah kan sa pynbeit ha ki shnong ki jongki.

Kino kino kiba pynkhein ia kane ka hukum kin shah pynshitom katkum ki kyndon ain jong ka Disaster Management Act, 2005 bad ka IPC. Kane ka hukum kan treikam  naduh ka por 5 baje mynstep lashai ka sngi ka 17 tarik u September 2021bad  kan iai neh tat ynda pynbna da kumwei pat.

Lah ban kdew hangne ba naduh ba la sdang ka khlam COVID-19 bad haduh mynta  mynne, haduh 236 ngut ki paidbah nongshongshnong jong ka thain Kynshi Pyllun ki la shah ktah ha kane ka khlam bad kat haduh mynta ka sngi dang don kumba 51ngut  ki nongshongshnong na kane ka thain  kiba dang don ia u khniang jingpang COVID-19.