La pynkhie im biang ia ia ka khana puriskam shaphang u Tiewlarun lyngba ka phlim Apot

Syllad | The Rising MeghalayaAugust 30, 2025

Ia ka khana puriskam u Khasi la pynkhieim biang lyngba ki dur khih da ka jingpyni kyrpang ia ka phlim Apot – ka jingiathuh khana shaphang u Tiewlarun haka 29 tarik Nailar ha Lariti Auditorium, Shillong ha ka jingiadon lang u Myntri ka Tnad Tourism u Bah Paul Lyngdoh.

Haba aijingkren u Bah Paul u la pynpaw halor ka jingkongsan jong ki khana tang ban pynneh pynsah ia ka kolshor bad ka jingithuh kaba kyrpang ia ka jaidbynriew, bad u la ai khublei ruh ia ka kynhun kaba don bynta, kynthup ia u Bah Raphael Warjri bad ki nongiashim bynta jong kane ka phlim.

U Myntri u la ong ba kane ka project phlim ka dei kaba jop bad pynpaw ka jingsngew skhem ba ka don ia ka lad ba kan ioh ia ka jingithuh hapoh ka ri bad shabar jong ka ri kumjuh. U la iaroh ruh ia ka rukom pynwandur ia ka jingiathuh khana shaphang u Tiewlarun ha kane ka phlim, da kaba ong ba ka la leh hok ia kane ka khana puriskam kaba iathuh khana pateng la pateng. U la bynrap ruh ba kane ka project kan aimynsiem shibun ia ki nongshna phlim kiba dang shu sdang.

Kane ka phlim ka dei kaba la pynshong nongrim ha ka khana puriskam tynrai u Khasi shaphang u Tiewlarun, u syntiew ba la mana pyrshah ban kheit namar ka jingngeit ba un wanrah ia ka ‘nemsniew. Kane ka phlim ka iathuh ia ka khana kaba sngew myllung shaphang u hymmen bad ka para kiba dei tang ma ki kiba ioh laitim na ka jingsar jong ka khlam hapoh ka shnong ka jong ki.

Haba ka para kam shym la pynsngap ia ka jingmaham jong u hymmen da kaba leit ban kheit ia u Tiewlarun bad ka jingjia ba sngewsih ka la wan jia, bad kaba pynmih ia ka khana jong ka jingieit, ka jingduh noh bad ka nusib ba la thoh.

Nalor ka jingiathuh khana, ka Apot ka dei ruh ka phlim kaba pyni ia ka jingitynnad ki jaka jong ka Meghalaya, kata naduh ki lum ki wah, ki khlaw ki btap bad ki riti dustur kiba neh bad kaba pynlong ia ka kum ka jingkynduh lang ha ka phlim bad ka jngiaid lynti ha ka kolshor.