La pyndep iaka niam ba khatduh jong i longkmie ba khlad ha MCH Jowai

Syllad | The Rising MeghalayaJune 8, 2025

Ka jingpynkhuid ia kaba sah jong i longkmie ba armet kaba la khlad 4 tarik Jylliew ha Maternal and Child Health (MCH) Hospital, Jowai la pyndep haka 7 tarik Jylliew haka shnong jong ka ha Jalaphet, East Jaintia Hills.

Ia ka niam ka rukom kaba khatduh la pyndep da ka Seinraij Jalaphet ha khlaw Shlaiñ.

Lah ban pynkynmaw ba iaka Kong Pynche Bareh naka shnong Jalphet, la pynkit nyngkong sha Sutnga CHC haka 2 tarik Jylliew hadien ba ka mad iaka jingphlei snam, bad ki doktor ka CHC ki phah ne refer iaka sha MCH Hospital Jowai ban ioh jingsumar kaba kyrkieh.

Kala wan sha MCH Hospital Jowai haka 3 tarik Jylliew da ka jingthmu ban kha khyllung. Haka step 4 tarik ki doktor ka MCH Hospital Jowai, kila bthah iaka Kong Pynche ban ym bam ym dih shuh namar ba kala dei ka por kha bad ban sumar noh iaka.

Hynrei hapdeng ka jingshah thngan, ki ba haiing kila kynnoh ba na ka liang ki doktor ki khlem wan peit wan jngoh iaka, wat haba kila pyrshang bun bunsien ban leit kylli na ki nos hato kin sumar ne ym sumar khnang ban ai jingbam namar ba kala sdang kem tlot.

Hynrei haka por nohphai sngi, ki nos ki pyntip ba kamdei ka sngi ban sumar iaka, kumta kila bthah iaki ba haiing ban ai bam ai dih noh iaka bad ba ka Kong Pynche kala ioh ban bam ban dih.

Haka por 6:20 baje janmiet ka Kong Pynche ka la ud shitom naka jingpheil snam bad haba ki ba haiing ki la pyrshang ban pan jingiarap na ki nos hynrei ki nos kila mai kila tim pynban iaka, la kynnoh ki ba haiing.

Hadien kane ka jingjia phlei snam, ki ba haiing ki iathuh ba u doktor ula wan ban peit ia katei ka longkmie bad phah soi kot ban phah sumar noh sha kiwei ki jaka sumar hynrei la lap ba la dier ka por bad kane ka longkmie kala khlad noh haka por 9.30 baje janmiet.

Halor ka jingkhlad jong i kong Pynche, ka bor district jong ka West Jaintia Hills kala thaw iaka committee ban tohkit da ki saw ngut ki dkhot kaba khlieh da ka Additional Deputy Commissioner Kong B Blah.