La pyndep ia ka jingleit on thang donburom ia ka met ba sah u President ka Seng Khasi Kmie

Syllad | The Rising MeghalayaOctober 18, 2023

Hapdeng ka jingbynnud kaba khraw, ia ka met kaba sah jong u President ka Seng Khasi Kmie,  u Rgh Donkupar Dkhar, (Rtd IAS), ba la khlad noh ha ka 15 tarik mynta u bnai la leit ban on thang donburom ha u lum jingthang ka Seng Khasi Kmie, ha Jaiaw, Shillong hynne ka sngi Balang.                   

Kiei eh kita ki matti ksiar ne ki matti rupa, ba une u nongialam ba Rangbah u la lah ban leh kum u nongialam ba rangbah jong ka Seng Khasi, ia kane la lah ban iohsngew shai kdar na ki arngut ki Rangbah nongkren jong ka Seng Khasi Kmie, katta u Rgh P.D Nongrum  u dkhot ka JPK, uba la shim ia ka bynta ban ai   jingkren ha iing bad u Rgh Paia B Synrem Asst General Secrertary Seng Khasi Kmie, uba la ieng ban ai ia ka jingkren ha ka por ba la pynrung ia ka met hapoh Iing Seng ha Mawklhar Shillong.

Hooid ym lah ban len ba ka jingduh kaba khraw tam kan dei ia ki khun ki kti ne ia ka kur ka jait, kaba hangne ruh la iohsngew kyndiang ia ki matti ksiar bad ki matti rupa, kiba u rgh Donkupar Dkhar, u ieh shadien. Hynrei haba phai sha ki kam kiba radbah kiba u la lah ba un leh, naduh ba u la shimti kum u  President ka Seng Khasi  Kmie ha u snem 2018, ym lah  ban jer lut, hynrei u la minot tyngeh ba  da kumno ban trei bad ban pyndep ia ka kam kum u nongialam uba  long da shisha u Rangbah nongialam uba shi beit shi lynti,  u bym juh randien ban leh ia kano kano ka kam wei shisien ba la dep ban shim rai ia ka, u kloi ban kner lem ia ka kti kamon ka kti kadiang ban sop ban spain ban loit ban law ia kino kino ki jingeh ba ki tnat Seng Khasi ki mad ia ka jingeh ka jingshah pyndik ha ka kam ka jong ki.

Ha ka jingleh burom  haiing la pyniaid ia ka jingialang da u Rgh O. Pyngriope Acting President ka Seng Khasi Kmie bad nalor ka jingkren na u Rgh P.D Nongrum dkhot ka JPK Seng Khasi Kmie, la ioh ruh ia ka jingkren na u u General Secretary ka Sein raij Jowai, u Ma Arwotki Sumer,   ka jingkren na ka kong F. Shabong Headmistress jong ka Seng Khasi Higher Secondary Schoolm, Jaiaw, katba ka kynhun jong Na Tbian Ki Sur Hara, ki la  ai ia ka jingrwai ka Jingduwai Ka Ri.

Ia ka nguh ka dem la pyndep da u Rgh Donbokstar Kurkalang, dkhot ka Kynhun U Tymmen U San ka  Seng Khasi Kmie. Hadien ba la dep ia ka leh burom bad lehniam na iing, ia ka met  kaba sah la wanrah pat sa hapoh iing Seng Khasi, ha Mawkhar, ha kaba hangne ia ka jingialang la pyniaid da u Rgh Wallamphang Roy Vice Presdient ka Seng Khasi Kmie  bad ia ka jingkren na ka liang ka seng la ai da u rgh Paia B  Synrem ba dei u Asst  Genl Secrertary ka Seng Khasi Kmie, katba ia ka nguh ka dem la ai da u Rgh Skor jala, Chairman ka Komiti U Tymmen U San Seng Khasi Kmie.

Nalor katta ki khynnah skul ka Seng Khasi bad kum samla pule jong ka Seng Khasi College lem bad ki nonghikai, ki la ieng arliang lynti ha iing seng bad kumjuh ha u lum jingthang, kum ka dak ban ai burom ia une u Rangbah nongialam.

Na iing seng khasi, ia ka met la rah pat sha u lum jingthang ha Jaiaw, kaba hangne u paid byllein bad ki Rangbah nongialam jong ki tnat Seng Khasi bad kumjuh jong ka Sein Raij, ki nongialam ka Seng Khihlang, Sengbah Ki Nongshat Nongkhein, Syiem ka Hima Khyrim Dr Balajied Sing Syiem, U President barim ka Sein Raij Jowai u ma O.R Challam ki la wan ban ai khublei khatduh ia une u nongialam ba khraw.