La pyllait ia u khaw rashon ha West Jaintia Hills

Syllad | The Rising MeghalayaDecember 20, 2023

U Additional Deputy Commissioner (Supply), West Jaintia Hills da kane u pyntip sha ki paidbah nongbam rashon jong ka district ba ia u khaw lyngba ka bhah AAY, PHH bad Non- NFSA na ka bynta u bnai Nohprah 2023 la dep ban pyllait lyngba ki dukan rashon naduh ka 13 haduh ka 15 tarik mynta u bnai.

Ka jingsam ia u khaw rashon ba la mang na ka bynta ki AAY ka long 35 kilo shi Card khlem da donkam siew pisa ha ki jaka sor bad ki thain nongkyndong. Ka bhah na ka bynta ki PHH ka long 5 kilo shi khlieh khlem donkam jingsiew ha ki jaka sor ba nongkyndong.

Kumjuh ia u khaw Non NFSA la pyllait ha ka jingthew kaba 7.215 kilo shi iing ha ka dor ba la buh beit da ka Vigilance Committee ka ban ym palat ia ka T.14/- ha ki jaka sor bad jaka nongkyndong.

Kumta la kyntu ia baroh ki dukan sam rashon ba kin wan shim noh ia ka permit jong ki na ka ophis u Deputy Commissioner (Supply), West Jaintia Hills bad ban pyndep ia katei ka jingsam ia u khaw hapoh ka 10 tarik u Kyllalyngkot 2023 da kaba pyndonkam ruh ia ka kor ePos machine lyngba ka online hapoh ki dukan rashon jong ki khlempep.