La pyllait bad sam ia ki draft electoral roll jong ki san tylli ki constituency ha West Jaintia Hills

Syllad | The Rising MeghalayaOctober 27, 2023

U Deputy Commissioner ka West Jaintia Hills u Bah BS Sohliya, IAS haka sngi Thohdieng ula pyllait bad sam ia ki Draft Electoral Rolls na ka bynta ka Special Summary Revision jong ki 4 tylli ki Constituency, kata ka 1-Nartiang, 2-Jowai, 3-Raliang bad 4-Mowkaiaw sha ki nongmihkhmat jong ki seng sain hima ha ka jingialang kaba la long hapoh conference Hall jong ka ophis DC.

Ha kane ka jingialang la ia don lang ruh ka Additional Deputy Commissioner (Election) ka Kong B. Blah, u ADC bah FB Basan bad ka ADC kong DV Lyngdoh.

Na ka liang u Bah Sohliya haba ai jingkren u la pynpaw ba ia kine ki Draft Electoral Roll jong ka Special Summary Revision na ka bynta kine ki sawtylli ki constituency la dep ban pynmih bad la buh por naduh ka 27 tarik u Risaw haduh ka 9 tarik u Nohprah 2023, ha kaba u la kyntu ruh ia ka jingiatreilang jong baroh ki party sain hima hapdeng jong kane ka por ban pynthikna ha kaba iadei bad ki kyrteng ha ka electoral role bad ban khmih ba yn ym don ki ba la dei hok ban ioh thep vote ba kin shah iehnoh.

Nalor kata ula kyntu ruh ia ki samla kiba la kot sha ka18 snem rta ba kin pynrung kyrteng noh ha ka Electoral Roll khnang ba kin ioh bynta ban iashim bynta ha kino kino ki jingjied ia ki nongmihkhmat paidbah.

Na ka liang ka Kong Blah ADC (Election) ruh ka la batai bniah ha kaba iadei bad kino kino ki jingujor ne jingpynbeit ia ki jingbakla naduh 27 tarik Risaw haduh ka 9 tarik u Nohprah 2023.

Ka la kdew ruh ba kino kino ki lah ban aplai na ka bynta ban pynrung kyrteng hapoh ka roll, bad kino kino ki jingpyrshah halor ki jingbym biang kum ha kaba iadei bad ki tarik sngi kha, ka jingpynbeit kyrteng, jingkynriah jaka shong lah ban pyndonkam da ka form 6, 6A, 7 bad 8 katkum ka jingdonkam ka jong ki.

Hapdeng jong kane ka por ka la ong ruh ba  ka ophis District Election kan sa pynlong da ka prokram SVEEP.

Shuh shuh ka pyntip ruh ba kan sa don ka special campaign ia kaba yn sa pynlong ha kaba iadei bad ka jingpynrung kyrteng ha ki Polling Station bapher bapher ha kaba ki BLO kin hap ban don kata ha ka 11 bad 18 tarik u Naiwieng u ban wan.

Na kaliang ka ophis u Electoral Registration Officer, 7-Amlarem (ST) Assembly Constituency ula pyntip ba la dep ban pynkhreh iaka draft electoral roll katkum ka Registration of Electors (Second amendment) Rules, 2022 bad kino kino ki lah ban wan jurip iaka electoral roll ha ophis u Electors Registration Officer, 7-Amlarem (ST) Assembly Constituency haka por longtrei.

Ka jingot snem na ka bynta ka jingpynkhreh iaka electoral roll kaba thymmai kalong naduh 01-01-2024.

La kyntu ia baroh kiban dap 18 snem katkum ka jingot snem, kata 01-04-2024, 01.07.2024 lane  01.10.2024 ki lah ban pynrung kyrteng haka Electoral roll lyngba ka Form-6.

Lada don kino kino ki jingujor lah ban ujor ha u Electoral Registration Officer, 7-Amlarem Assembly Constituency naduh 27 tarik Risaw haduh 9 tarik Nohprah.