La khang pyrshah ban pynieng kali naduh Khyndailad shaduh Motphran

Syllad | The Rising MeghalayaOctober 19, 2023

Ka Deputy Commissioner ka East Khasi Hills District, ka Kong RM Kurbah, IAS kala pynmih iaka hukum ban khang pyrshah ha kaban pynieng kali (No parking zone) naduh Khyndailad, Police Bazaar (Uncle’s Shop), Shillong shaduh Motphran naduh lashai ka sngi Thohdieng.

Kino kino kiba pynkhein ia kane ka jingmaham kin ngat ha ka jingshah pynshitom ha ki bor ba dei khmih, ong kane ka hukum ba la pynmih ha ka sngi ba Ar ba la lah.

La pynmih ia kane ka hukum hadien ba la lap ia ka jingpynieng kali beain ha lynter jong kane ka surok bah NH-40 naduh Khyndailad shaduh Motphran.

Nalor kata la shem ruh ba kane ka jingpynieng kali beain ka dei ka dawbah kaba la wanrah ia ka jingdheng kali hapoh Shillong, ong katei ka hukum.

Shuh shuh na ka liang ka DC ka la ong ruh ba la khang pyrshah ha kaba iadei bad ka jingpynieng kali beain ha lynter ki surok bah National Highway, kata na ka bynta baroh ki jait kali lait noh tang ha kito ki jaka pynieng kali ba la ioh jingithuh.