La khang ïaka Dawki PHC hadien ba ïabit khlam COVID-19 haduh 13 ngut na Darrang

Syllad | The Rising MeghalayaApril 11, 2021

Haduh 13 ngut ki briew kila iabit jingpang khlam COVID-19 haka shnong Darrang, West Jaintia Hills District bad ka bor shnong kala rai shi syndon ban khang shnong bad ym shah ia kiba briew kiba nabar ban rung ban mih klumar hapoh shnong.

U Secretary Shnong jong ka Darrang u Bah Kitbok Ryngksai ula iathuh baroh 13 ngut ki nongpang la pynthikna bala test COVID-19 positive iaki haka sngi U Blei. Ula iathuh ruh ba kane ka jingpang kala iabit na kawei ka ïing iap briew kaba la jia haka 31 tarik u bnai Lber.

Na kane ka ïing iap briew la test haduh 21 ngut bad 13 ngut kila ngat ha une u khniang jingpang.

Na kaliang ka shnong da ka jingiatreilang bad ka tnad ka koit ka khiah kala rai ban khang shnong haduh 10 sngi ban pyndep iaka jingbuddien (Contact Tracing) ia kiba iakynduh ia ki briew kiba ioh pang COVID-19.

Shuh shuh haba kren bad u Doktor ba dei khmih iaka Dawki PHC, ula ong ba don uwei u briew uba kila pdiang ha katei jaka sumar uba la pyni iaki dak ki shin ba don jingpang COVID-19, hynrei ula koit bad la phah shong kset ïa u ha ïing haka shnong Darrang ban tem ïaka jingpur ka khlam COVID-19.

Ula ong shuh shuh ba la khang iaka Dawki PHC ar sngi haka 12 bad 13 tarik une u bnai Ïaiong 2021 na ka bynta ban pynkhuid iaka aspatal. Ula ong ruh ha kine ki ar sngi kim ym pdiang ia kino kino ki nongpang ne kiba wan shim dawai ha aspatal.