La ithuh ia ki jaka ieng kali ha sor Shillong, yn lum bai pynieng naduh 1 tarik Nailar

Syllad | The Rising MeghalayaJuly 5, 2025

Ka sorkar Jylla ka la ithuh ia bun tylli ki jaka pynieng kali ha ki rud surok ha sor Shillong bad ruh ki jaka kiba khang pyrshah ban pynieng kali nalor ka jingpynbna ban lum ia ka bai pynieng kali ka ban sdang treikam naduh ka 1 tarik u Nailar 2025.

Kane ka jingpynbna kan treikam ha ki jaka kiba hap hapoh ka Sadar Traffic Branch, Madanrting, Laban, Mawlai, Rynjah, Lumdiengjri bad Laitumkhrah.

Ia kane ka jingpynbna la pynmih da u Commissioner & Secretary ka Tnad Urban Affairs ha ka 26 tarik Jylliew kaba pyntip halor ka dor bai pynieng kali kaba long T.20 na ka bynta shi kynta ia ki kali ar shaka bad T.40 ia ki kali saw shaka ha ki surok ba don ki jaka iew (commercial area), bad T.15 ia ki ar shaka bad T.30 ia ki saw shaka kiba pynieng ha ki jaka bym don ki jaka iew (non-commercial area).

Ka Tnad kala thaw ruh ia hynniew tylli ki Zonal Task Force ban khlieh da ki Additional District Magistrate ban peit ban khmih ia ka rukom pynieng kali.

Kane ka sienjam ba la shim da ka Sorkar ka long shibynta jong ka jingpyrshang ban weng iaka jingkhapngiah ha ki jaka sor bad ban pyrkhing ia ka jingpynieng kali thurmur ha kylleng ki jaka.