La ioh kem ia uwei uba donkti thombor ia u nongialehkai Cricket ka Meghalaya

Syllad | The Rising MeghalayaOctober 6, 2023

Ki bor pulit ha ka 5 tarik mynta u bnai ki la ioh ban kem noh ia uwei napdeng ka kynhun kaba donkti ha kaba thombor ia u nongialehkai Cricket ka jylla uba kyrteng u Lakhan Singh uba mihkhmat ia ka Meghalaya sha ka Ranji Trophy.

Na ka liang u Superintendent of Police ka East Khasi Hills District, u Bah Sylvester Nongtnger haka sngi Thohdieng u la pyntip ba u Lakhan Singh u la shah thombor ha ka kynhun ki runar katba u dang don ha ka lynti ban leitphai sha la iing sha Jhalupra ha ka 4 tarik mynta u bnai ha ki thain Anjali Petrol Pump, Shillong.

Katkum ka jingujor FIR hapoh cantonment beat house, la ong ba kawei ka kali ka la shim pass ia ka scooty kaba u niah bad phah ba un sangeh hadien ba katto katne ki runar ki la hiar napoh ka kali bad sdang ban ktahkti ia u bad kaba la wanrah ka jingmynsaw kaba malu mala na ki bynta jong ka durkhmat. Halor kane ka jingjia la rejistar case ruh hapoh Sadar police station.

Na ka liang utei u heh pulit u la ong ba ia une u runar uba la shah kem la leit lam noh shapoh ka kashari hadien ba la set ia u da ki pulit. U la ong ruh ba mynta ka jingthwet ban ioh kem ia kiwei pat kiba donkti ka dang iaid shakhmat.