La iasoi MOA halor ka jaka theh ñiut ka Jowai, la pyndam iaka jingiakut ka JHADC bad JMB

Syllad | The Rising MeghalayaAugust 14, 2021

Mynta ka sngi la iasoi iaka soskular kaba la tip kum ka Memorandum of Agreement hadpeng Jaintia Hills Autonomous District Council (JHADC), Jowai Municipal Board (JMB), Shnong, Khasi Students’ Union (KSU) bad ka Synjuk Waheh Shnong War Jaintia na ka bynta ban pyndonkam iaka jaka theh ñiut ka sor Jowai ha Mynkjai.

Ka dorbar shnong Mupyut kala rai ban ailad ban pyndonkam ia kane ka jaka kum ka jaka theh ñiut ka sor Jowai na ka bynta 3 bnai. Kane ka long katkum ka jingialang kaba long haka 13 tarik kaba iadonlang u Myntri sorkar uba long u MLA ka thain Amlarem ma Lahkmen Rymbui, Deputy Commissioner, West Jaintia Hills District, CEO JMB bad ki nongialam shnong kiba shah ktah naka jngtheh ñiut ha Mynkjai.

Ha kane ka jingiasoi MOA la pyndam iaka jingiakut ka JHADC bad ka JMB ban theh ñiut ha katei ka jaka naka bynta 20 snem namar bala leh khlem ka jingtip jong ki 9 shnong kiba shah ktah.

Katkum ka MOA ia kane ka jaka ñiut la shah ban pyndonkam tang naka bynta shipor. Lada don kano kano ka kam pynroi, ka JHADC bad ka Mupyut ki dei ban ia pyntip markylliang.

Ha kane ka jingiasoi soskular la iadonlang u MLA Jowai, Wailadmiki Shylla, Deputy Commissioner, CEO, JMB u Deputy Secretary JHADC bad ki nongialam shnong, synjuk waheh shnong War Jaintia, KSU, Mupyut Unit.

Naka liang u ma Wailadmiki Shylla ula ai khublei ia u ma Lahkhmen Rymbui, ki heh shnong Jong ki 7 shnong ba ki la aiad biang ban bret ñiut kiba la lah ban iakren pynbeit halor kane ka jingeh.

Ula ai khublei ruh u myntri pynroi sor Sniawbhalang Dhar, ki Synjuk Waheh Chnong Ka rilum Jaintia bad ia u CEO ka Jowai Municipal Board. U la pynpaw bad kyrmen skhem ia kane ka jingeh yn lah ban pynbeit noh mardor khnang ban pynjem iaka jingeh ha kaba iadei bad ka jingbret ñiut ka sor Jowai.