La hynriew sien rah ka Niaw Wasa Utd iaka Kiang Nangbah Memorial Trophy
Ka Niaw Wasa Utd kala ioh biang ban rah iaka nam lahduh hadien ba kala lah ban pynliem da 2-1 iaka Ladthadlaboh haka final Super Division Football Tournament- U Kiang Nangbah Memorial Trophy kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka 16 tarik Nohprah.
Ia kine ki ar kol, ka Niaw Wasa kala thep lyngba u Civility Khongmalai ha ka minit kaba 58’ bad u Pynshai Lathong haka minit kaba 60’.
Shikol ka Ladthadlaboh kala thep lyngba u Sanki Langstang 86’.
Kane ka jingiohrah nam lahduh ka Niawa Wasa ka dei ka sien kaba hynriew bad kane ka kynti, kata naduh u snem 2016, 2017, 2018, 2021, 2022, 2023. Ka Niaw Wasa kala long teng ruh ka lahduh jong ka Meghalaya State League.
Da kane ka namjop ka Niaw Wasa United kaba la ioh iaka song pisa kaba 50 hajar tyngka katba ka Ladthadlaboh ka la ioh iaka song pisa kaba 30 hajar tyngka ryngkat ka Trophy.
La sam ruh iaka khusnam Man of the Match sha u Dashngain Sukhlain, ka nam Best Goal Keeper la ioh da u Pynshngainlang Tyngkra baroh arngut kidei jong ka Niaw Wasa United, ka nam Top Scorer ba la ioh da u Banteilang Shylla jong ka Ladthadlaboh SC uba la ioh haduh 7 kol bad ka nam Player of the Tournament la ioh da u Risanlang i Dkhar jong ka Niaw Wasa United.
Iaka jingiakhun phainal la wan ban sakhilang da u MLA ka Jowai u Ma Wailadmiki Shylla, MDC u Ma Octomewot Lamin, u District Sports Officer, West Jaintia Hills District u Ma Khroobok Passah, u Working President WJDSA u Ma EMH Passah, ki dkhot nongkitkam ka WJDSA nalor kiwei kiwei.
Facebook
Instagram
Youtube
Twitter
Leave a Reply