La buh ia ka ktem pulit ba shipor ha Lapangap, 30 ngut ki pulit ban pynneh iaka suk ka sain: Dy CM

Syllad | The Rising MeghalayaJuly 3, 2025

U Symbud Myntri Rangbah ka Jylla uba khmih ia ka tnad Home (Police) u Bah Prestone Tynsong haka sngi Balang u la pynpaw ba ka jnglong jingman ha ki thain khappud ka Meghalaya bad Assam ka la kham jai jai bad ki jingpyrshang kiba kyrpang ki dang bteng na ka bynta ban pynneh ia ka shongsuk shongshngain ha ka shnong Lapangap.

Haba kren sha ki lad pathai khubor, u Bah Prestone u la ong ba ka sorkar ka la buh ia ka ktem pulit ba shipor ha ka shnong Lapangap bad la buh haduh 30 ngut ki bor pulit kiba treikam baroh 24 kynta ban pynneh ia ka shongsuk shongshngain.

U la ong ba na ka liang ka sorkar Assam ruh ka la buh mar kumjuh ki bor pulit sha u pud u sam jong ki.

Nalor kata u la pynpaw ruh ka jingsngew skhem ba ka jinglong jingman ka la kham jai jai bad pyntip ruh ba na ka liang u Myntri Rangbah ka Jylla un sa rah iakren ia kane ka kam bad u Myntri Rangbah ka Assam khnang ban lah ban pynbeit noh ia ki kam kiba dang sahteng.

“Hooid, na ka liang u Myntri Rangbah un sa pynlong ka jingiakren bad u Myntri Rangbah ka Assam. Ym tang katta, ka la don ruh ka jingiakren hapdeng jong ki lyngba ka phone halor kane ka kam,” ong u Dy CM.

Haba kylli halor ka jingthmu ban buh ia ka ktem pulit kaba neh shirta, u Bah Prestone u la ong ba ia ka jinglah ban pynkylla ia kane ka ktem shipor sha ka ktem kaba neh shirta yn sa shong bishar bniah hadien ba ka jingjai jai kan wanphai pura.

U la ong ruh ba ia mynta hi kane ka ktem ba shipor ka thmu ban peit na ka bynta ka jingdonkam ba kyrkieh kaba iadei bad ki kam shong shngain hapoh kane ka thain.