Kyrshan u nongialam ka NPP ban pyrshah halor ka rai khang bam doh masi

Syllad | The Rising MeghalayaDecember 11, 2024

U Working President ka NPP Meghalaya uba dei ruh u Myntri Sorkar u Marcuise N Marak u la ai ka jingkyrshan ia ka jingpynpaw da u MLA ka BJP u Bah Sanbor Shullai ban pyrshah jur halor ka rai khang bam doh masi jong ka Sorkar Assam da kaba ong kano kano ka jingbam ka dei ka hok laitluid jong uwei pa uwei u nongshong shnong.

“Ngi dei ka ri synshar paidbah bad ngi long laitluid ban bam ia kano kano kat kaba ngi kwah. Ka jingbam ka dei ka hok jong uwei pa uwei u briew, kumta ngam pdiang satia ia kaba kum kane ka jingkhang bam doh masi ha kano kano ka Jylla,” ong u Marak haba kren sha ki lad pathai khubor ha ka 10 tarik Nohprah.

Da kaba pynpaw ba ka rukom bam ka dei ka bynta jong ka rukom im, u Myntri u la ong, “Kum ka nuksa ngi dei ki riewlum, bad ngi bam ia kiba bun jait ki jait jingbam bapher bapher. Kumta lada phi khang ia ka rukom bam kata kam long kaba bha bad kam dei satia kaba lah ban pdiang.”

U la ong ruh ba ki briew ki don ia ka hok ban kren laitluid khlem kano kano ka jingkhang bad ka long ka jingshisha ba ia ki hok ba kongsan jong ngi la khanglad lyngba kum kine ki jingkhang pyrshah.