Kyrshan ka PDAM ia ka jingkhynra ki pulit halor ka kam tuh bad khleh um ia ka umphniang ha shiteng lynti

Syllad | The Rising MeghalayaNovember 29, 2023

Ka Petroleum Dealers Association of Meghalaya (PDAM) haka sngi Ar kala pynbna ba ka Association ka kyrshan kaba pura ia ka jingkhynra bad ka jingkem jong ki pulit ka jylla ia ki katto katne kiba donkti ha kaba tuh umphniang petrol/diesel ha shiteng lynti jong ki surok bah ka Jylla.

Haba kren sha ki lad pathai khubor u president ka Association Bah Kennedy Khyriem ula iathuh ba kane ka jingiatuh umphniang bad ka jingiakhleh um ha shiteng lynti kala iaid mynta la bun snem bad kane kala wanrah ka jingduh nong kaba jur ia ki Petrol pump bad ka jingma ia ki paidbah kiba pyndonkam ia ka umphniang.

U Bah Kennedy ula iathuh ba ka jylla kam don Petroleum ne Diesel na lade bad ka donkam ban kit na shabar ka jylla, hynrei bun ki Petrol Pump ha Meghalaya ki shah shet ha ki Trok kiba wanrah umphniang na shabar Jylla.

Ula iathuh ruh ba ki kali kiba kit ia ki umphniang petrol bad diesel ban pynpoi sha Meghalaya ki dei ki jingim jong ki Petrol Pump ki ban pynpoi umphniang sha ki paidbah ka Jylla. Nalor kata u Bah Kennedy ula iathuh ba ki Petrol Pump ha Meghalaya ki don ka jaka pyllang umphniang kumba 60 hajar haduh 1 lak Litre katkum ka jingheh ki Petrol Pump.

“Ha kaba iadei bad kane ka kam iatuh bad ka jingiakhleh um ha ki umphniang, na ka liang ki bor pulit kila pynlong ka jingtalasi ha kaba kila ioh ban kem ruh iaki katto katne kiba donkti ha kine ki kam beain. Ka PDAM ka kyrshan pura ia kane ka jingleh ki Pulit” la ong u president.

Shuh shuh u Bah Kenedy ula ong ruh ba ka Association ka kyrshan ia ka Sorkar bad ia ki pulit ka jylla kiba la trei shitom ban pynduh jait ia kum kine ki jinglehtuh ia ka umphniang kali bad pynrem jur lada don kano kano ka jingleh donbor da ki Pulit kumba la kynnoh da ka seng North East Petroleum Mazdoor Union (NEPMU).

Haba kyntu ia ki paidbah, u Bah Kennedy ula ong; “Ki paidbah ka jylla kim dei ban khuslai namar ka Jylla ka don ka Umphniang ban pynbit pynbiang ia ka jingdonkam ki paidbah.