Kyrpad u Conrad ban thaw ia ka Meghalaya Cadre bad pyniakhlad noh na ka Assam

Syllad | The Rising MeghalayaSeptember 5, 2025

U Myntri Rangbah ka Jylla, u Conrad K Sangma, haka 4 tarik Nailur u la kyntu ia u Myntri ka Tnad Kam Pohïing ka Sorkar Pdeng, u Amit Shah, ba ka Meghalaya dei ban don la ka jong ka cadre bad ban pyniakhlad noh na ka Assam, namar kaba mynta hi ka long tang ka Meghalaya–Assam kiba don iaka joint cadre.

Halor ka jingtyrwa ban pyniakhlad noh ia ka joint cadre bad ka Assam, u Conrad u la ong, “Mynta ngi don ia ka Meghalaya-Assam joint cadre, kaba ym don ha kiwei ki jylla. Kumta, lada lah ban pyniakhlad noh ia ka cadre, ka Jylla Meghalaya kan ioh ka jingmyntoi kaba khraw ban don ia ki ophisar kiba tbit bad kiba kyrpang tang na ka jylla.”

U Conrad u la pynkynmaw biang ruh ia ka jingdawa ban pyntreikam noh ia ka Inner Line Permit (ILP), da kaba ong ba ka dei tang kane ka lad kaba biang ban khanglad na ka jingwan buhai shnong be-ain da ki briew kiba na bar, kumjuh ruh ban tehlakam ia ka jingwan rung tuh jong ki nong Bangladesh lyngba ki jaka khappud ka Meghalaya.

U Myntri Rangbah u la ong ba ka Iingdorbar Thaw Ain ka Jylla ka la dep mynjur ia ka resolution bad ka la aiti ruh shibun tylli ki memorandum sha ka Sorkar Pdeng na ka bynta ban ioh ia ka ILP na bynta ka Meghalaya.

“Ngim ju klet ban pynkynmaw biang ia u Myntri kam Pohïing halor kane ka mat, khamtam haba buh ha ka jingmut ia ka jinglong jingman ba mynta ha ki jaka khappud bad ha ki ri ba marjan. Ka long kaba donkam ym tang ban pynkhlaiñ ia ki bor pahara bad ban tei bun ki jingdon jingem ha khappud, hynrei ruh ban don ia ki lad jingiada kiba lah ban khanglad ia ka jingwan buhai shnong be-ain bad ka jingwan rung tuh. Haba shim kyllum ia ki jinglong jingman bad ki aiñ kiba don mynta hapoh ka ri, ka lad kaba kham biang ka dei tang ka ILP. Halor kata, nga kyntu biang ia u Myntri ka Sorkar Pdeng ba un shimkhia halor kane,” ong u Myntri Rangbah.

Nalor kata, U Conrad u la pynkynmaw biang ruh ia ka jingdawa ba la slem jong ka Jylla ban pynrung noh ia ka Ktien Khasi bad Garo ha ka Khyrnit kaba Phra jong ka Riti Synshar Ri bad u la ong, “Nga pynkynmaw biang ia u Myntri kam Pohïing ba ngi la mynjur ia ka resolution halor kane hapoh ka Iingdorbar Thaw Ain bad la bunsien ngi la aiti ruh ki dorkhas sha u.”

Ha kawei pat ka bynta, u Conrad u la kyrpad ba kawei ka surok ha New Delhi lah ban ai kyrteng ha ka kyrteng u Purno Agitok Sangma, uba la noh synñiang shibun na ka bynta ka thain Shatei Lammihngi, ki jaidbynriew riewlum bad ki ritpaid jong ka Ri.