Kyrpad ki nongtrei JHADC ia u CM Conrad ban pyllait noh iaka pisa T. 19 klur

Syllad | The Rising MeghalayaJuly 1, 2025

Ki nongtrei jong ka Jaintia Hills Autonomous District Council (JHADC) hapoh ka lama JHADC-Staff Association, kila kyrpad ia u Myntri rangbah ka Jylla Conrad K Sangma ba un pyllait noh iaka pisa kaba T.19 klur tyngka kumba ula dep ban kular lyngba ki lad pathai khubor.

Kitei ki nongtrei jong ka JHADC kila pynkynmaw, ba u Myntri rangbah ka Jylla haka jingwan hiar jong u sha Jowai haka 21 tarik Jymmang 2025 ula pynbna ban pyllait pisa 20 klur tyngka sha ka Jaintia Hills Autonomous District Council (JHADC) bad ba ka konsil ruh kala dep ban siew tulop na ka bynta 2 bnai kata jong u bnai Risaw Naiwieng 2024 shaki nongtrei jong ka.

Ha katei ka juh ka sngi, u Myntri rangbah ula kular ruh ba hapoh ar ne lai taiew ka Sorkar Jylla kan sa pyllait sa 19 klur tyngka sha ka JHADC hynrei haduh mynta ka JHADC ka khlem pat ïoh pdiang ïa kata ka 19 klur na ka sorkar Jylla, la ong ki nongtrei ka JHADC.

Kumta kila kyrpad ia u Myntri rangbah ba un pyllait noh ia katei ka 19 klur kumba ula kular khnang ba ka konsil kan ioh ban siew iaka tulop ba sah jong ki nongtrei kata naduh u Nohprah 2024 haduh Jylliew 2025 bad ba kin ioh ban lehkmen Behdienkhlam kumjuh ruh ba kin ioh ban siew iaki ram ki shah ki jong ki.