Kyntu u Myntri ia ki DS ban thaw ia ki VDP ban iatreilang ha ka jingiakhun pyrshah drok

Syllad | The Rising MeghalayaSeptember 3, 2025

U Myntri ka Tnad Social Welfare u Bah Paul Lyngdoh ha ka 2 tarik Nailur u la kyntu ia ki Dorbar Shnong ban iatreilang ryngkat bad ka sorkar ban iakhun pyrshah ia u drok da kaba thaw ia ki Village Defence Party (VDP) ha la ki jong ki shnong.

Haba kren sha ki lad pathai khubor, u Bah Paul u la ong ba ka sorkar ka la pynthymmai bad kyntiew ia ka jingiarap song pisa na ka bynta ki dkhot VDP na ka T.800 sha ka T.3000 shi snem.

Katkum ka jingong ka jong u, ki dkhot VDP kin iarap ia ka Tnad pulit lyngba ki jingtip bad ki jinglapksai khlam da donkam ban don ha ki surok baroh 24 kynta.

U Myntri watla katta u la pynpaw ka jingsngewkhia ba wat hadien ki jingpyrshang jong ka sorkar hynrei ki don tang 11 tylli ki VDP ha Shillong, ka sorbah kaba don haduh palat 6 lak ngut ki nongshong shnong.

Nga la iakren bad ki Dorbar Shnong ha ka jingialang kaba la long ha NEC building ha Nongrim Hills ha kaba bun na ki Dorbar Shnong kiba heh jong ka sor Shillong ki la wan iashim bynta, bad ngi la kyntu ia ki ban shim ia ka VDP skhim naba ki VDP ki dei kiba la ithuh da ka ain bad kaba la ai ia ka bor bad jingiada da ka ain bad kiba treikam ruh ryngkat ryngkat bad ka tnad pulit, u la ong,

“Nga kyntu ia ki Dorbar Shnong ba kin wan shakhmat bad shim kabu halor kane ka jingtyrwa jong ka sorkar jylla namar kane kam dei ka jingialeh hapdeng ka sorkar bad ki paidbah, hynrei ka dei ka jingiatreilang jong ngi bad u paidbah na ka bynta ban iakhun pyrshah ia u drok,” bynrap u Bah Paul.

Nalor kata u la pyntip ruh ba hynriew ngut ki nongkhaii drok kiba la shah kem la bunsien ki la shah kem bad shah set hapoh ki kyndon  PITNDPS na ka bynta shi snem, kaba lah ruh ban pynjlan lada shem ba ki dang iai bteng ban leh ia kane ka juh ka kam bymman.

Na ka liang ka sorkar ka la ai ruh da ka khusnam da ka song pisa sha ki dkhot ka ANTF bad ki Volunteer kum ka jingithuh ia ka jingtrei shitom ka jong ki ha ka jingiakhun pyrshah ia ki kam khaii drok.

“Dang shen nga la leit jngoh ia ka ophis ka ANTF bad ngi la ai ruh ia ka song pisa kaba mar T.10,000 sha ki dkhot ka bym pat ju leh satia ha ki snem kiba la leit noh.Kine ki dei ki sienjam kiba khraw shibun,” u la ong.