Kyntu u MLA Raliang ban shim mardor ia ki sienjam ban pynneh pynsah ia ka wah Umiurem

Syllad | The Rising MeghalayaSeptember 1, 2025

U Myntri sorkar bad MLA ka Raliang u Bah Comingone Ymbon u la kyntu ia ki nongshong shnong ba kin shim mardor ia ki sienjam kiba donkam kyrkieh na ka bynta ban pynneh pynsah ia ka wah Umiurem kaba dei ka tyllong ba kongsan na ka bynta ka shnong Shangpung.

Haba kren hadien ka jingialang pynkhuid shnong kaba la khot pynlong da ka Shangpung College haka 30 tarik Nailar, u la ban jur ba kane ka wah ym tang ba ka bsa ia ka umbam umdih, ban pynioh um sha ki jaka rep bad na ka bynta ki jingdonkam kiba man ka sngi, hynrei ka don ruh ia ka jingmut kaba jylliew ha kaba iadei bad ka kolshor bad ka histori na ka bynta ki paidbah nongshong shnong jong kane ka shnong.

Haba pynkynmaw ia ki por ba u dang long kum u Waheh Shnong bad President ka Shangpung Village Council ha ki snem 2005–2006, u Bah Comingone u la pynpaw ia kawei ka jingthmu kaba kongsan na katei ka por ba kum shibynta ban ai jingiada iaka wah, la shim iaka rai ba ymbit ban tei jingtei ne tei iing tei sem 100 mitar ka jingjngai naka wah Umiurem bad kane ka iai treikam haduh mynta mynne.

U la kdew ba ha ki por kiba la leit noh, ki nongshong shnong kiba leit sha ki um ki wah kiba don ha ki shnong ki thaw da kaba suk ki lah ban ioh ia ki um kiba khuid bad kiba bang ba shngiam. Hynrei, mynta u la ong namar ka jingpom ia ki khlaw ki btap bad ka jingnang jur jong ka jingbun briew, ki jingtih ba khlem da pyrkhat na ki jaka lum, ki wahduid bad ki wah ki la sdang ban pynduna ia ka jingdon um.

Kumta u la ong ba kane ka jinglong jingman ka la pynmih ia ka jingdonkam ba kongsan ban pynneh pynsah ia ka wah Umiurem kaba la pynlong ia ka shnong ba kan pynlong ia ki prokram pynsngewthuh paidbah ha shilynter jong kane ka wah, da kaba pynlong ia ki jingthung dieng bad ka jingpyrshang ban pynneh pynsah ia ka mariang bad ki sawdong sawkun ha baroh ki bynta jong ka shnong Shangpung.

Na ka liang u Myntri u khot ruh ia baroh ki nongshong shnong ha ka jylla ban sumar bad aijingiada ia ki wah, ki wahduid bad ki umpohliew bad ban leh da ka jingkitkhlieh namar ka um ka dei ka tyllong kaba kongsan tam kaba ym lah ban pynioh biang da kaba suk.

“Ka Wah Umiurem kam dei tang ka tyllong um, hynrei kadei u thied snam jong ka shnong Shangpung. Ban aijingiada ka dei ka kamram jong ngi, bad ka pateng kaba ngi dei ban sumar na ka bynta ka pateng ka ban wan,” u la bynrap.