Kyntu u MLA ia ki samla ban kiar na drok, u nongshun jong ka jaidbynriew

Syllad | The Rising MeghalayaJune 19, 2025

U Bah H.S. Kharpran MLA Mawryngkneng haba kren kum u kongsan haka Awareness Programme on Drug Abuse and a Menace to the Society” u la ong ba u drok u long kum u seinpuh bad nongshun jong ka jaidbynriew.

U la kyntu jur ruh ia ki khun samla ba kí dei ban kiar shi syndon na une u jait jingdih ba shyrkhei uba pyntroin ym tang ia kito kiba pyndonkam ia u hynrei ruh ia ka imlang ka sahlang bad ka jaidbynriew hi baroh kawei.

Kane ka awareness prokram dei kaba pynlong da ka seng Ieng Rasong Sports Social and Cultural Club, Shillong haka sien kaba ar ha ka jingiatreilang bad ka Yess Meghalaya ha ka 13 tarik Jylliew ha lew Thymmai, Mawryngkneng, East Khasi Hills.

U Bah Kes Nongpluh Rangbah Dong Nongmadan Mawryngkneng ula pyniaid iaka jingialang bad la ioh ruh iaka jingkren na u Dr. David Lyngdoh, nongialam jong ka seng uba la ong kane ka dei ka jinghiar thma ba jar jar ne ka ‘Silent War’ jong u drok ban pyntroin ia ka pyrkhat pyrdain jong ki khun samla ki jong ngi.

U Bah Shemphang Marbaniang, Resource Person na Social Welfare Department uba la pynpaw ba katkum ka jingkhein census na ka liang ka Sorkar bad ka Social Welfare Department tang ha u snem 2023 kiba la kyrni ha u drok ki don haduh 2,50,000 bad tang ki kynthei ki don 30,000 ngut. U la ong ruh ba ka jingjyllei kine ki drug addict ka la nangkiew.

Hadien la pynbud ia ka jingkren na u Bah Samuel Lamthom 2nd Officer Incharge Mawryngkneng Police Station uba la ban jur ba ki khun samla ki dei ban kiar na u drok da kaba ong ruh ba na ka liang ka jong ki, ki la trei shitom ban kem ia ki nongdih bad nongdie drug sha kine ki thain Mawryngkneng.

Kiwei pat kiba la aijingkren ki kynthup ia u Bah Meban Tariang, Counsellor KRIPPA Foundation Nongsder uba la aijingmut ia ki khun samla shynrang bad kynthei ba ki dei ban kiar shisyndon na ki jingdih ba sniew kum u drok bad kiwei kiwei bad ong ruh ba dei ban ainguh bad buh jingduwai ia U Blei ba un pyllait na kine ki jingdih na ka jingim jong ki.

La pynphuh pynphieng ia kane ka sngi d ka jingrwai kyrpang na ki khynnah skul jong ka Mawryngkneng Higher Secondary School.

La pynbud ia kane ka prokram da ka jingialehkai drama shaphang u drok da ki khynnah skul jong ka Mawryngkneng RMSA Secondary School.

Ia ka jingkren pynwai la ioh na I Kong L. Lyngdoh Khongsngi, Working Vice President jong ka Seng iba la khublei kyrpang ia ka Dorbar Shnong Mawryngkneng ba ki la ai jingbit ban pynlong ia kane ka prokram kaba jop.