Kyntu u Dy CM ban vote ia ka NPP khnang ban ioh jingmyntoi na ka sorkar ar enjin

Syllad | The Rising MeghalayaFebruary 16, 2025

U National General Secretary ka Natinal People’s Party (NPP) bad Symbud Myntri Rangbah ka Jylla u  Bah Sniawbhalang Dhar ha ka 15 tarik Rymphang u la kyntu ia ki paidbah ka Mynsngat-Khanduli constituency ba kin vote ia u kyrtong ka NPP u Bah Pheinchwa Nanglein ha kane ka elekshon sha ka JHADC khnang ba kin ioh ia shibun ki jingmyntoi lyngba ka sorkar ar enjin (double engine).

Haba aijingkren ha ka jingialap elekshon ha ka shnong Sanaro, u Bah Sniawbhalang u la kular ba hadien ka elekshon un pynthikna ban sdang ban shna noh ia kiba bun tylli ki surok hapoh ka constituency.

Haba pynpaw ba kane ka shnong ka dei ka ktem ba khlain jong ka NPP, u Bah Dhar u la ong, “Kumno phin aijingkyrshan ia kiwei pat ki kyrtong haba ka Natiang constituency ka dei ka bynta jong ka sorkar. Kumta, nga kyntu ia phi ba wat shah ialam bakla ha kiwei pat ki party namar lada u kyrtong jong ngi un shah jied, la pynthikna ba phin ioh shibun ki jingmyntoi na ka sorkar ar enjin.

“Ka long kaba biang lada kiwei ki kyrtong ki ialap, hynrei ki paidbah ki la ong ba kim long pyrshah ia ka VPP bad ia kiwei kiwei ki party, hynrei kin pynthikna ba ka NPP kan jop na kane ka constituency,” u la ong da kaba bynrap, “Kane ka dei namar wat hapdeng ki jingpyrshang jong kiwei kiwei ki party, ki khun shynrang bad kynthei jong nga ki tip ba ka niam kam treikam ha ka politik.Ka politik ka dei ka politik bad ka niam ka dei ka niam, ngim dei ban pyniakhleh ia kine ar.”

Nalor kata, u Dhar u la kular ruh ba un bteng ban trei na ka bynta ka roi ka par jong ka constituency hi baroh kawei.