Kyntu u DC ka EJH ban kiar najan u tower ba jan khyllem ha shnong Shymplong

Syllad | The Rising MeghalayaMay 5, 2024

U Deputy Commissioner uba dei ruh u Chairman ka District Disaster Management Authority (DDMA), East Jaintia Hills District u la buh ka jingkyntu ia ki nongshong shnong ban shim ia ki lad jingiada da kaba kiar ban leit tur shajan u tower uba la jan khyllem ha ka shnong Shymplong.

U Chairman u la ong ba ki la ioh ia ka jingtip ba ka jaka kaba don u 400 KV D/C Silchar-Byrnihat-Azara Transmission line jong ka NETC (Tower no.152) ha ka shnong Shymplong u la ngat ha ka jingma na ka jinglah ban khyllem namar ka jingshna pynheh ia ka surok shnong da ka Tnat PWD (Roads).

Nalor kata la ioh jingtip ruh ba ka la don ka jingtwa khyndew hajan katei ka jaka ba ieng utei u tower bad kaba la nangbuh jingma shuh shuh halor ka jingnang jur jong ka jingtwa khyndew namar ka jingther jong u ‘lapbah.

Kumta khnang ban iada na ka jingkhyllem jng uwei u tower bad na ka bynta ka jingshngain jong ki nongleit nongwan bad ki jingdon jingem ha ki bynta jong kane ka jaka kumta ruh la hukum ia u Executive Engineer, PWD (Roads) NEC Division, Khliehriat na ka bynta ban shim mardor ia ki sienjam ban khanglad ia ka jingtwa khyndew shuh shuh ha kane ka jaka.

Kumta ruh hapoh ki kyndon jong Section 34 (c) ka Disaster Management Act, 2005, na ka liang u Deputy Commissioner bad Chairman District Disaster Management Authority (DDMA), EJHD u la kyntu ia ki riew paidbah ba kin shim ia ki lad jingiada da kaba kiar ban leit shajan katei ka jaka ba don utei u tower khnang ban lait na kino kino ki jingjia kiba lah ban wan jia tad haduh ba ka tnat PWD kan shim ia ka sienjam ban khmih na ka bynta ka jingshngain ha katei ka jaka.