Kyntu u CM ia u Myntri Sorkar Pdeng ban bthah ia ka NTA ban buh Centre eksam CUET ha Meghalaya

Syllad | The Rising MeghalayaMay 11, 2025

U Myntri Rangbah ka Jylla, u Conrad K Sangma u la kyrpad ia u Myntri Sorkar Pdeng ba dei khmih iaka tnad Education u Dharmendra Pradhan ba un bthah ia ka National Testing Agency (NTA) ba kan bishar biang khnang ban pynioh lad ia ki samla pule ka Meghalaya ba kin thoh ia ka eksam Common University Entrance Test (CUET-UG 2025) ha ki Centre ha la ka jong ka jylla.

Ha ka shithi sha u Pradhan, u Sangma u la ong, “Nga kyntu jur ia ka jingtuklar lem ka jong phi ban bthah ia ka NTA ba kan bishar biang khnang ban plie lad ia ki samla pule ka Meghalaya ba kin thoh ia ka eksam CUET-UG 2025 ha ki Centre ha la ka jong ka jylla. Ban mynjur ban pynjlan ne pynkynriah shwa ia ka eksam na ka bynta ki samla pule ka Jylla mynta u snem tad haduh ba pynthikna halor ka jngpynbiang ia ki Centre thoh eksam. Kane ka kyrpad ka mih na ka jingdonkam kyrkieh hapdeng ki samla pule jong ngi, bad nga shaniah ba ka ophis jong phi kan ai ia ka jingmynjur kumba dei hok ban ioh.”

U la ong ba ka mat kaba iadei bad ka jingpynlong ia ka eksam CUET-UG 2025 bad ka jingbym pat biang ki Centre thoh eksam hapoh ka jylla ka la wanrah ka jingsngew bynniaw hapdeng ki samla pule bad ki kmie ki kpa jong ki ha kylleng ka jylla Meghalaya.

Katkum ka jingpynpaw ka jong u ki don bun bah ki samla pule kiba la jied ban ialeh ia ki eksam ha Meghalaya khamtam ha Shillong kiba la shah pynngat sha ki jaka kiba jngai bah kum sha Jorhat, Dibrugarh, Mizoram, Nagaland bad wat shaduh Kolkata.

“Kane ka jinglong jingman ka la buh jingeh shibun ia kiba bun ki samla pule khamtam kito kiba wan na ki longiig kiba duna ha ka ioh ka kot kaba la pynbor ia ki ba kin hap sa ban pynlut na ka bynta ka bai leit bai wan bad ka jaka sah. Ha kiba bun ki khep kine ki jinglut jingsep ki la long palat ia ka jingioh jingkot ka jong ki,” ong u Conrad da kaba bynrap ba kane ka jingeh kaba mih na kane ym tan ba ka pynthut ia ka jingpynkhreh jong kine ki samla pule hynrei kaba la pynbor ruh ia ki katto katne ba kin hap ban pynsangeh noh ban leit iakhun ia ka eksam. Kane ka jinglong jingman ka la iai mih wat hapdeng ki jingiai kyrpad bad ki jingkular ha ki snem ba la dep ban wanrah ia ki Centre thoh eksam hapoh ka jylla.”

“Ka long kaba kongsan ban kdew ba ka sorkar Meghalaya ka la ai ka jingkyrshan kaba pura ia ka NTA da kaba ithuh ia ki Centre kiba donkam bad ki jingtyrwa ia ka jingiatreilang da ka sorkar. Ngi la thaw ruh ia ka State Level Committee ha ryngkat ki District Level Committee na ka bynta ka jinglah ban pyniaid beit iaid ryntih ia ki eksam NTA hapoh ka jylla. Hynrei, wat hapdeng kine ki jingpyrshang pynban ka jingbym pynngat Centre thoh eksam ka dang iai long ka daw kaba wanrah jingeh shibun,” u la pynpaw.