Kyntu u CM ia ka Finance Commission ban kyntiew 25% ka bhah khajna sha ki jylla ba rit ka Northeast

Syllad | The Rising MeghalayaJuly 8, 2025

U Myntri Rangbah ka Jylla u Conrad K Sangma u la kyntu jur ia ka 16th Finance Commission ban kyntiew la kumno kumno 25% ka bhah khajna na ka bynta ki jylla ba rit jong ka thain Shatei Lammihngi (North East).

U Sangma u ba iadonlang bad ka kynhun jong ki sawtylli ki jylla ba rit ka thain North East kaba kynthup ia ka Meghalaya, Mizoram, Tripura bad Sikkim kiba la leit iakynduh ia ka 16th Finance Commission ha New Delhi bad buh lang ia ki jingdawa kiba iadei bad ka jingpynioh ia ka bhah song pisa.

Kane ka kynhun ka kynthup ruh ia u P Lalduhoma, Myntri Rangbah ka Mizoram, Pranajit Singha Roy, Myntri Pla tyngka ka Tripura nalor ki ophisar ka Sorkar Sikkim. 

Kane ka kynhun ka la pynpaw ka jingsngewnguh ia u Arvind Panagariya, Chairman kumjuh ia ki dkhot ka 16th Finance Commission halor ka jingplielad ia ki jylla ba rit ka thain North East ban ioh ia ka kabu ban pynpaw ia ki jingeh bad ki jingthmu ba kongsan jong ka thain.

Ka kynhun ka la ban jur ia ka bynta ba kongsan jong ki jingai jingmut jong ka Finance Commission halor ka bhah jong ki khajna ka Sorkar Pdeng ba ju ai sha baroh ki jylla, bad pynpaw ba kane ka long kaba kongsan na ka bynta ka jingkiew jong ka ioh ka kot na ka bynta ki Jylla khamtam ki jylla ba rit ka thain North East kiba la mad ia ka jingduna pisa.

U Myntri Rangbah ka Meghalaya u la pynpaw ba ka jingkiew kaba 20% ha ka bhah khajna lyngba ka 14th Finance Commission sha ka 15th Finance Commission ka la sakhi ia ka jingkiew kaba 100% ha ka jingpynlut pisa jong ki Jylla.

Kane ka jingkyntiew ia ka bhah pisa ka la lah ban kyntiew ha ki kam aijingshakri ha ka liang ka koit ka khiah, ka jingroi ha ki kam jngohkai pyrthei bad ha ki jingtei ba kongsan ha ki bynta bapher bapher jong ka jingshakri.

Ia ka jingroi jong ka thain kumba ka long mynta bad ki jingdonkam ban pynneh ia kane ka jingkiew la ban jur da u Myntri Rangbah ka Mizoram bad u Myntri Pla tyngka ka Tripura.

Ha ka jingiamir jingmut u Myntri Rangbah ka Meghalaya u la iasaid jur bad ka 16th Finance Commission ka dei ban ai ka jingmynjur ban kyntiew ia ka bhah khajna la kumno kumno sha ka 25% na ka bynta ki jylla ba rit jong ka than North East na kaei kaba la ai da ka 15th Finance Commission bad ruh ia ka song pisa ba kyrpang halor ki jingtei na ka bynta kine ki Jylla.

Kane ka jingdawa ba la iamynjur lang da baroh saw tylli ki Jylla kala ioh ia ka jingkyrshan da kawei ka sur na baroh ki Jylla kiba la iashim bynta ha ka jingialang.

Na ka liang u Chairman bad ki dkhot jong ka 16th Finance Commission ki la ai ia ka jubab kaba sngewtynnad, haba pdiang ia ki jingeh kiba kham pher bad ki jingkiew ha ka ioh ka kot ha kine ki jylla ba rit ka thain North East ha kane ka 15th Commission kaba dang iaid shakhmat.

Ka jingialang ba la pynbeit da ka Tnad Pla tyngka ka Meghalaya ka la kut hapdeng ka jingkyrmen ha kaba baroh ki nongiashim bynta ki la pynpaw ia ka jingkyrmen ia ka jingmih kaba seisoh bad ka ban lah ban nangkyntiew shuh shuh ia ki jylla kiba rit jong ka thain North East.