Kyntu u CM ban pynioh ia ka Disability Sports Complex shwa ka National Games 2027

Syllad | The Rising MeghalayaMarch 19, 2025

U Myntri Rangbah ka jylla u Conrad K Sangma haka 19 tarik Lber u la leit iakynduh ia u Myntri ka Sorkar Pdeng uba khmih ia ka Tnad Social Justice and Empowerment u Dr Virendra Kumar bad kyrpad ban shimkhia lem na ka bynta ban tei ia ka Sports Centre for Persons with Disabilities ha Meghalaya ka ban pynlong ia ka National Games ha u snem 2027.

Ha ka shithi jong u sha u Dr Kumar, u Conrad u la ong, “Nga kyrpad ia ka jingkyrkhu na phi na ka bynta ban bhah ia kane ka jaka ialehkai na ka bynta ki briew kiba don jingduna ha ki dkhot met jong ka Jylla Meghalaya bad nga pynthiknaha phi ia ka jingkyrshan bad ka jingiatreilang ba pura jong ka sorkar jylla na ka bynta ban lah ban tei pyndep ia kane ka project ialehkai sports kaba kongsan.”

U Conrad u la ai khublei ia une u Myntri ka Sorkar Pdeng halor ka jingshimkhia ban tei ia ki san tylli ki Centre for Disability Sports for persons with disabilities hapoh ka ri.

“Nga ngeit skhem ba kane ka sienjam kan iarap shibun ha kaba pyndonkam ia ka jinglah jong ki briew kiba don jingduna ha ki dkhot met ynda la tei ia ki. Ka long da shisha ka jingsarong ia ngi ba kawei na ki Disability Sports Complex  naka bynta kiba don jingduna yn tei Shillong, Meghalaya. Kane ka Centre kan aijingmyntoi ruh ia ka thain Shatei Lammihngi bad ia ka Meghalaya ha kaba kum kane ka jaka ialehkai ka long kaba donkam bha,” ong u Conrad.

Haba pyntip ba ka Meghalaya kan pynlong ia ka National Games ha u snem 2027, u CM u la ong, ” Kaba kum kane ka Sports Centre na ka bynta ki briew kiba don jingduna kan long ka jingnoh synniang ia ka jingdonkam ia ki jingtei na ka bynta ka National Games.”

Pan por u CM 6 bnai ban pyndep jingpyniasoh Aadhaar ki nongioh jingmyntoi na ka SNP

U la ong ruh ba na ka liang ka sorkar ka la dep ruh ban iakren bad ka Tnad Persons with Disabilities ba ia ka jaka kaba heh 40 akar ha Mawkhanu, Mawpdang, New Shillong Township (NST) la dep ban mang na ka bynta katei ka Centre bad ia katei ka jaka lah ban pynthikna na ka bynta ban tei ia katei ka Centre ha ryngkat ka jingiamir jingmut bad ka Sorkar India.

“Ngi dap da ka jingsngew burom ban pdiang ia ki ophisar na ka Tnad jong phi ha ka 13 tarik Rymphang 2025. Ka jingwan jngoh ka jong ki ka la nangpynskhem ia ka jingkular halor kane ka project bad ngi angnud ban iatreilang bad ka Tnad khnang ban pynurlong ia kane ka jingthmu,” u la ong da kaba ong,” Ngi kular skhem halor kane ka project ha ka kyrdan kaba halor tam bad ba ka sorkar jylla kan pynlut halor ka jingpynmadan ia katei ka jaka, ban pynbit pynbiang ia ka jaka bad kiwei ki jingdonkam na ka bynta ban tei ia ka Centre for Disability Sports.”