Kyntu u Bah Sanbor ia u Lat ban kyntiew kyrdan ia ka Red Cross Hospital kaba la rim bah

Syllad | The Rising MeghalayaJune 22, 2024

U MLA ka BJP na South Shillong u Bah Sanbor Shullai ha ka 21 tarik Jylliew u la kyntu ia ka jingtuklar lem jong u Lat ka Jylla u Phagu Chauhan na ka bynta ban kyntiew kyrdan bad ban shna thymmai noh ia ka Lady Kerr Welfare Centre (Red Cross Hospital), Shillong kaba la rim bah.

“Nga kyrpad ia phi ban phah ia kane ka jingtyrwa sha ka Ministry of DoNER lyngba ka Tnat Planning ka sorkar Meghalaya khnang ban pynkloi ia ka jingai jingmynjur,” ong u Bah Sanbor ha ka memorandum ba la ai sha u Lat ha katei ka jingleit iakynduh ha Raj Bhavan.

U Bah Shullai u pyntip ruh ba ka Lady Kerr Welfare Centre kaba don hapdeng jong ka nongbah Shillong ka dei ka jaka aijingsumar kaba ioh ia ka jingshaniah hapdeng ki trai shnong lem bad kiwei pat ki nongshong shnong kumjuh na ka bynta ki jingdonkam kiba iadei bad ki lad jingsumar mynta la bun phew tylli ki snem.

Hynrei, u la ong ba mynta ka jinglong jingman jong kane ka jaka sumar kaba don ha Laban ia kaba la pyndonkam ruh da ka IRCS naduh u snem 1920 ka la jot la tor, kata hadien palat 100 snem bad kaba la shem shitom ruh ban maramot ia ka.

Kumta u la ong khnang ban pynlong ia kane ka jaka sumar kaba don ia ki kor ki bor bad ki tiar ki tar kiba katkum kane ka juk kaba mynta, ka long kaba donkam kyrkieh ban kyntiew kyrdan bad ban shna thymmai ia ka ha ryngkat ki tiar ki tar kiba thymmai nalor ka Blood Bank.