Kyntu u Bah Paul Lyngdoh ia ka HNLC ban ym weng na ka miej iakren iasuk

Syllad | The Rising MeghalayaJanuary 6, 2024

U nongaiktien ka sorkar MDA uba dei ruh u dkhot ka kynhun Myntri, u Bah Paul Lyngdoh haka 5 tarik Kyllalyngkot u la kyrpad ia ka Seng Hynniewtrep National Liberation Council (HNLC) ba kam dei ban weng noh na ka miej iakren iasuk kaba dang iaid shakhmat bad ka sorkar jylla kumjuh ka sorkar pdeng.

Haba kren sha ki lad pathai khubor, u Bah Paul u la ong ba ka sorkar ka la iohi ia kane ka jingshim rai jong ka HNLC ban weng noh na ka jingiakren iasuk kaba dang iaid shakhmat tang lyngba ki lad pathai khubor, hynrei kam shym la don satia kano kano ka jingai jingtip da ka jingthoh sha ka sorkar kat haduh mynta.                              

U Bah Paul u la ong, “Ka HNLC kam dei ban mih noh na kane ka jingiakren iasuk namar ki la lah ban pyndep ia bun ki bynta kiba iadei bad kane ka jingiakren bad ngi kyrmen ban lah ban pyniaid shuh shuh shakhmat bad ba ngi dei ban lah ban wanphai sha ka miej jong ka jingiakren.”

U la ong ruh ba un ym lah ban kren palat halor kane ka mat namar na ka liang u Myntri Rangbah ka jylla u Conrad K Sangma bad u Symbud Myntri Rangbah uba khmih ia ka tnat kam Pohiing u Bah Prestone Tynsong ki don shabar ka jylla.

Hynrei, u la ong ba khlem artatien ka sorkar jylla kan shimkhia halor kane ka bynta bad ruh ba kane ka dei ban long shen shen mar ia wanphai u Myntri Rangbah bad u Symbud Myntri Rangbah.

Ha kaba iadei bad ka jingdawa jong ka Seng HNLC ban weng noh ia baroh ki case ba la pynngat pyrshah ia ki nongialam bad ki dkhot jong ka kaba dei ruh ka jingdawa kaba hakhmat eh jong ka Seng, u Bah Paul u la ong, “Hooid ki lah ia ka ban pdiang bad kaba shong eh halor ka jingban khia jong kawei pa kawei ka case ba la rejistar, hynrei da shisha ka dei ban long bad kaba lah ban pdiang.”