Kyntu u bah Banteidor ïa ki skul bad kolej ban sdang pyntrei kam noh ïa ka sports policy

Syllad | The Rising MeghalayaMay 28, 2022

U Myntri ba dei khmih ia ka tnat sports & youth affairs ka jylla bah Banteidor Lyngdoh, u la ong ba ia mynta, ka tnat ka jong u ka dang ap satang ia ka jingpynkhreh ia ka operational manual, kaba long ka kynja jingmaitphang ban lah ha kaban pynkhreh naka bynta ban pyntreikam noh ia ka sports policy hangne hapoh ka jylla.

U bah Banteidor, u la ong ia kane, ha ka jingialang kitbok kitrwiang bad ai khublei ia ka kynhun ialehkai ka jylla, kiban leit ban mihkhmat sha ka lympung bah ialehkai ka ri ba la tip kum ka Khelo India Youth Games kaba la buh ban long ha Panchkula, Haryana naduh ka  3 haduh ka 14 tarik u nai Jylliew u ban wan.

Shuh shuh na ka liang ka jong u bah Banteidor, u la iathuh ba ha ka jingialang kaba dang shen bad la ki ophisar jong ka tnat, na ka liang ka jong u, ula ban jur ia ki ba kin khmih bad peit bniah, kiei ki bynta ne ki kyndon kiba la dep ban pruid dak ha ka sports policy, kiba lehse kiban lah ban pyntreikam noh ia ki khnang ban lah ban ai ia ki lad jingiarap ia la ki jong ki khun samla.

Nalor katta u bah Banteidor u shim ia kane ka kabu ban kyntu ruh ia baroh ki skul bad ki kolej kiba don hangne hapoh ka jylla, ba kin shim khia noh na ka liang ka jong ki ba maki ruh ki la dei ka por ban nang sdang ban pyntreikam noh ia ka sports policy ha ki jaka pule ki jong ki bad lada don kino kino ki jingkwah jingtip kiba shai shuh shuh, ki nongialam ia ki skul bad kolej, ki lah ban ia kynduh ia ki ophisar jong ka tnat sports.