Kyntu peitngor u Dr Mukul ia ka Sorkar ba lah ban mih biang ki kynhun seng lehnoh

Syllad | The Rising MeghalayaSeptember 4, 2025

U Nongialam ka Liang Pyrshah u Dr Mukul Sangma u la kyntu ia ka sorkar Jylla ba kan long kaba husiar bad peitngor da kaba shimkhia halor ki jingma bad ban weng ia ki jingeh kiba pynlong ia ki samla ba kin leit pyniasoh ne ban seng ia ki kynhun seng lehnoh.

U la buh jingkylli ha kaba iadei bad ki jingjia halor ka jingwan pyndem jong u Drishti Rajkhowa uba dei u nongialam barim jong ka seng lehnoh United Liberation Front of Asom (ULFA), ha South Garo Hills.

Haba kren sha ki lad pathai khubor ha ka 3 tarik Nailur u Dr Mukul u la ong ba kham hashwa u la dep ban kdew halor ka jingdon jong u Rajkhowa hapoh Rilum Garo, ia kaba hadien la pynthikna da ka jingwan pyndem noh ka jong u, bad haduh mynta ki don katto katne ki jingkylli ia kaba ka sorkar kam pat shym la jubab.

U la buh jingkylli ruh ia ka jingdon jong ki briew kiba synran lang ia u Rajkhowa ha ka por ba u la wan ban pyndem wait bad ia ki bor sorkar ba dei khmih kiba u Rajkhowa u la wan ban pyndem.

“Ngi donkam ban buh jingkylli na ka sorkar..katno ngut ki samla shynrang ki don hangta? Hato la khmih lynti ba un don ha ka jaka kaba pajih tam jong ka ri ryngkat tang bad arngut ki nongbud, bad haba u wan pyndem ialade ki jait tiar aiu kiba u la wan ban pyndem wait?Kumta phi hap ban pyniasoh ia kine kiei kie bad pan jingshai na ka sorkar.

U Mukul u la kynthoh ruh ia ka sorkar khamtam ia u Myntri Rangbah ka jylla u Conrad K Sangma halor ka jingkloi ka jong u ban kyntait bad ka jingkyntait ban shim ia ka jingkitkhlieh ban pynthikna ia ka jingsuk bad ban khanglad ia ka jingmih biang ki kynhun seng lehnoh ha ka jylla.

Haba kyntu ia ka sorkar ban long kaba peitngor, kaba husiar bad shimkhia, une u Myntri Rangbah barim ka jylla u la ong, “Haba ngi iakren shaphang ki jingioh jingtip, hato kane ka jingioh jingtip ka dei tang ha Rilum Khasi Jaintia? Hato ym ioh jingtip ei ei na Rilum Garo? Ka shong ha ka sorkar ba kan bishar bniah ia kine ki jingtip ba ioh lum bad ban pyndonkam ia la ka jingstad ban lah ban pynkut noh. Lehse ka lah ban long ba u Myntri Rangbah um sngew iahap ban kren ia kane ka mat hakhmat ki lad pathai khubor, hynrei ha ka jingshisha hi ka dei pat ka kamram jong ka sorkar ban long kaba peitngor ba husiar bad shimkhia.”

“Ka sorkar ka dei ban tip kiei ki daw kiba pynlong ia ki samla ba kin leit iasoh ne thaw ia ki kynhun lehnoh bad ban pynthikna ba ngim dei ban ailad ia kine kiei kiei ba kin khie rasong bad ka dei ka kamram jong ka sorkar ban shim ia ka jingkitkhlieh.