Kyntu MLA ka Jowai ia u Myntri ka rep ka riang ban pynioh lad jingiarap iaki nongrep

Syllad | The Rising MeghalayaJune 2, 2020

U MLA jong ka Jowai Ma Waildmiki Shylla, uba la pynbna ban iarap ïaki nongrep ka Jowai Constituency haduh T.40 lak sha ki 800 ngut ki nongrep naka MLA skhim jong u, mynta ka sngi ula iakynduh ia u Myntri ka tnad ka kam rep kam riang Bah Banteidor Lyngdoh ban kyntu ïa u pynioh jingiarap ïaki lanot shlei ka West Jaintia Hills District.

Kumban shu pynkynmaw ba haka jingshim jingkhein u MLA ka Jowai iaka jingpynjulor ka mariang ha District West Jaintia la iathuh ba haduh 35 percent ki nongrep kila shah ktah na ka jingshlei um kaba jia naka jingther ka lyer cyclone Amphan kaba la wanrah u slap ba jur haka taiew kaba la dep.

Ha kane ka jingwna lyngshop ka mariang bun ki jingthung jingtep kila julor bad shah rat haka lyer bad ka um saw, katba ki hali hator pat kila shah tap haki shyiap, maw bad kiwei kiwei kaba la pynduh mynsiem ïaki nongrep.

U Myntri kam rep kam riang u Bah Banteidor Lyngdoh ula shimkhia ban pynioh ki lad jingiarap naduh ki symbai, ki sboh ryngkat ka dor kaba la pynduna (subsidy) naka sorkar bad wat ki nongrep kiba la ioh ia u symbai bad sboh dangshen ruh kin ioh biang iaka jingiarap khamtam kito kiba la shah ktah haka jinglyngshop ka mariang.